پاکستان سنگل ونڈو (PSW) نے ملک کے امپورٹرز اور ایکسپورٹرز کے لیے ایک نئے اور جدید یونيفائیڈ پیمنٹ سسٹم (UPS) کا اعلان کیا ہے جس کے تحت اب تاجر کسٹمز ڈیوٹیز، ٹیکسز اور دیگر تجارتی اخراجات ایک ہی پری فنڈڈ ڈیجیٹل والٹ کے ذریعے ادا کر سکیں گے۔ اس نئے نظام کا بنیادی مقصد سرحد پار ہونے والی تجارتی ادائیگیوں کو تیز، شفاف اور آسان بنانا ہے۔
ڈیجیٹل والٹ کس طرح کام کرے گا؟
اس نئے فریم ورک کے تحت تاجروں کو ایک ایسا ڈیجیٹل اکاؤنٹ یا والٹ فراہم کیا جائے گا جس میں وہ ایڈوانس رقم رکھ سکیں گے۔ تاجر اپنے اس اکاؤنٹ کو انٹر بینک فنڈ ٹرانسفر (IBFT)، راست (Raast)، موبائل بینکنگ ایپس، یا بینک کاؤنٹر پر جا کر آسانی سے ٹاپ اپ (رقم جمع) کروا سکیں گے اور ضرورت پڑنے پر رقم واپس نکال بھی سکیں گے۔
تاجروں کے لیے نیا ڈیجیٹل پیمنٹ سسٹم اسٹیٹ بینک آف پاکستان (SBP) کی منظور شدہ گائیڈ لائنز کے تحت کام کرے گا۔ اس والٹ کو چلانے کی ذمہ داری کسی لائسنس یافتہ بینک یا فن ٹیک (Fintech) کمپنی کو دی جائے گی، جو فنڈز کی حفاظت، ریفنڈز اور منی لانڈرنگ کے خلاف قوانین (AML) کی نگرانی کرے گی۔ پاکستان سنگل ونڈو (PSW) خود گاہکوں کے فنڈز کو اپنے پاس نہیں رکھے گا، بلکہ یہ صرف سسٹم کو مانیٹر کرے گا۔
ملکی تجارت اور تاجروں کے لیے اس کے فوائد
موجودہ نظام میں تاجروں کو پری ڈپازٹ (PD) اکاؤنٹس اور مختلف بینکنگ گیٹ ویز کا استعمال کرنا پڑتا ہے۔ یہ نیا والٹ پرانے نظام کی جگہ نہیں لے گا بلکہ ایک اضافی اور زیادہ باسہولت آپشن کے طور پر متعارف کروایا جا رہا ہے۔
اس سسٹم کا سب سے بڑا فائدہ یہ ہو گا کہ تاجروں کو ہر چھوٹی بڑی ادائیگی کے لیے الگ سے بینک ٹرانزیکشن نہیں کرنی پڑے گی۔ وہ ایک ہی بار اپنے والٹ میں فنڈز پارک کر کے پی ایس ڈبلیو، میری ٹائم سنگل ونڈو اور ایئر کمیونٹی سسٹم سمیت تمام منسلک اداروں کے چارجز سیکنڈوں میں ادا کر سکیں گے۔ اس سے نہ صرف وقت کی بچت ہو گی بلکہ ہر لین دین کا شفاف ریکارڈ اور ٹریکنگ بھی ممکن ہو سکے گی جو پاکستانی بزنس کمیونٹی کے لیے ایک گیم چینجر ثابت ہو گا۔
