ترکیہ نے غیر ملکی سرمایہ کاروں کو راغب کرنے کے لیے ایک نیا اور پرکشش رہائشی منصوبہ متعارف کروا دیا ہے۔ ترکیہ کا نیا گولڈن ویزا پروگرام غیر ملکی شہریوں کو جائیداد خریدے بغیر محض 1 لاکھ 50 ہزار ڈالر کی سرمایہ کاری کے بدلے تین سالہ رہائشی اجازت نامہ حاصل کرنے کی سہولت فراہم کرتا ہے۔ ترک صدر رجب طیب اردوان کی جانب سے صدارتی فرمان نمبر 11994 پر دستخط کیے جانے کے بعد یہ فیصلہ 18 نومبر 2026 کو سرکاری گزٹ میں شائع ہو کر فوری طور پر نافذ العمل ہو گیا ہے۔
سرمایہ کاری کے چار منظور شدہ طریقے اور شرائط
اس نئے پروگرام کے تحت اہل سرمایہ کار اپنے شریکِ حیات اور زیرِ کفالت نابالغ بچوں کے لیے بھی رہائشی اجازت نامے حاصل کر سکتے ہیں تاہم یہ پرمٹ ترکیہ میں ملازمت یا کام کرنے کی اجازت نہیں دیتا۔ ترک حکومت نے اس اسکیم کے لیے براہِ راست جائیداد کی خریداری کو خارج کر کے سرمایہ کاری کے درج ذیل چار متبادل ذرائع منظور کیے ہیں:
بینک ڈپازٹس: بینکنگ ریگولیشن اینڈ سپرویژن ایجنسی (BDDK) سے تصدیق شدہ ترک بینکوں میں رقم جمع کروانا۔
سرکاری بانڈز: وزارتِ خزانہ و مالیات کی ضمانت یافتہ گورنمنٹ بانڈز کی خریداری۔
انویسٹمنٹ فنڈز: کیپٹل مارکیٹس بورڈ سے منظور شدہ رئیل اسٹیٹ یا وینچر کیپیٹل انویسٹمنٹ فنڈز میں حصص خریدنا۔
پرائیویٹ پنشن پلانز: انشورنس اینڈ پرائیویٹ پنشن ریگولیشن ایجنسی کے تحت نامزد نجی پنشن اسکیموں میں سرمایہ کاری کرنا۔
سرمایہ کاروں کو اپنی سرمایہ کاری رہائشی اجازت نامے کی کم از کم نصف مدت تک برقرار رکھنا ہوگی یعنی تین سالہ پرمٹ کے لیے 18 ماہ اور پانچ سالہ پرمٹ کے لیے 30 ماہ جس کے بعد وہ اپنی رقم واپس نکلوا سکتے ہیں۔
شہریت کے قوانین سے علیحدگی اور درخواست کا طریقہ کار
ترکیہ کا نیا گولڈن ویزا پروگرام ترک شہریت حاصل کرنے کا راستہ فراہم نہیں کرتا کیونکہ اس فیصلے کے تحت جاری ہونے والے پرمٹس کو ترکیہ کے شہریت قانون کے آرٹیکل 12 سے مستثنیٰ رکھا گیا ہے۔ واضح رہے کہ ترکیہ کا موجودہ ‘شہریت برائے سرمایہ کاری’ پروگرام اس سے بالکل الگ ہے جس کے لیے رئیل اسٹیٹ میں 4 لاکھ ڈالر یا مالیاتی اثاثوں میں 5 لاکھ ڈالر کی سرمایہ کاری تین سال کے لیے رکھنا لازمی ہے۔
ماہرینِ معاشیات کے مطابق کم سرمایہ کاری کی یہ شرط ان بین الاقوامی سرمایہ کاروں کے ایک نئے طبقے کو متوجہ کرے گی جو ترکیہ میں رہائش یا کاروبار میں دلچسپی رکھتے ہیں لیکن شہریت لینا یا جائیداد خریدنا نہیں چاہتے۔ ترک وزارتِ داخلہ جلد ہی اس نئے رہائشی پروگرام کے لیے درخواست جمع کروانے کا مکمل طریقہ کار جاری کرے گی۔






