K2 ونٹر ایکسپیڈیشن ڈاکیومنٹری The Last First: Winter K2 کو امریکا میں منعقد ہونے والے 2026 کے سنڈینس فلم فیسٹیول میں بین الاقوامی سطح پر سراہا گیا۔ یہ فلم پاکستانی کوہ پیما محمد علی سدپارہ اور آئس لینڈ کے مشہور کوہ پیما جان سنوری کی 2021 کی سردیوں میں K2 سر کرنے کی کوشش کی المناک داستان بیان کرتی ہے۔
ایوارڈ یافتہ ہدایتکار امیر بار لیو کی بنائی گئی یہ ڈاکیومنٹری دنیا کے دوسرے بلند ترین پہاڑ K2 کے سب سے خطرناک موسم کو دکھاتی ہے، جہاں شدید سردی، تیز ہوائیں اور جان لیوا حالات کوہ پیماؤں کا انتظار کرتے ہیں۔
سردیوں میں K2 سر کرنے کی خطرناک دوڑ
کہانی جان سنوری اور علی سدپارہ کے ساتھ ان کے بیٹے ساجد سدپارہ کی ٹیم پر مرکوز ہے جو سردیوں میں پہلی بار K2 کی چوٹی تک پہنچنے کا خواب لے کر نکلے۔ اس ہدف کو کوہ پیمائی کی دنیا کا “آخری بڑا کارنامہ” کہا جاتا ہے۔
اسی مہم کے دوران کئی کوہ پیما جان سے گئے جبکہ علی سدپارہ اور جان سنوری واپسی پر لاپتا ہوگئے۔ ساجد سدپارہ زندہ بچ گئے اور بعد میں اپنے والد کی تلاش میں شامل رہے۔ وہ سنڈینس میں فلم کی پریمیئر تقریب میں بھی شریک ہوئے اور جذباتی لمحات شیئر کیے۔
کوہ پیمائی کی بدلتی ثقافت
K2 ونٹر ایکسپیڈیشن ڈاکیومنٹری جدید کوہ پیمائی کے مسائل بھی سامنے لاتی ہے جیسے کمرشلائزیشن، سوشل میڈیا کا دباؤ، انفلوئنسر کلچر اور غیر ضروری مقابلہ بازی۔ امیر بار لیو بتاتے ہیں کہ K2 واحد پہاڑ تھا جو طویل عرصے تک سردیوں میں سر نہیں ہوا، اسی لیے یہ سب کی توجہ کا مرکز بن گیا۔
یہ فلم صرف پہاڑ سر کرنے کی کہانی نہیں بلکہ انسان کی خواہش، خطرے اور قربانی کی طاقتور تصویر ہے۔
