واٹر اینڈ پاور ڈویلپمنٹ اتھارٹی (WAPDA) نے بلوچستان کا ڈومیسائل رکھنے والے اہل امیدواروں کے لیے مختلف محکموں اور توسیعی منصوبوں میں گریڈ سات سے گریڈ سولہ تک کی 37 خالی اسامیوں پر بھرتیوں کا باضابطہ اعلان کر دیا ہے۔ واپڈا کی جانب سے جاری کردہ اشتہار کے مطابق یہ بھرتیاں لاہور، چشمہ، تربیلا، منگلا اور داسو سمیت مختلف شہروں کے دفاتر اور پروجیکٹس کے لیے کی جا رہی ہیں جس میں خواتین اور اقلیتوں کا کوٹہ بھی شامل کیا گیا ہے۔
اسامیوں کی تفصیلات اور تعلیمی قابلیت کا معیار
محکمے کی جانب سے جاری کردہ لسٹ کے مطابق سب سے زیادہ دس اسامیاں اسٹاف نرسز (گریڈ 16) کے لیے مختص ہیں جس کے لیے رجسٹرڈ اے گریڈ نرس ہونا لازمی ہے۔ اس کے علاوہ جونیئر کلرک کم کمپیوٹر ٹائپسٹ کی پانچ اسامیاں (انٹرمیڈیٹ پاس، 40 الفاظ فی منٹ ٹائپنگ اسپیڈ اور تین ماہ کا ایم ایس آفس سرٹیفکیٹ)، ایل ٹی وی ڈرائیورز کی چھ پوزیشنز (میٹرک پاس اور پانچ سالہ تجربہ) اور ٹرینڈ گریجویٹ اساتذہ کی چار اسامیاں (ماسٹرز ڈگری مع بی ایڈ یا ایم ایڈ) شامل ہیں۔ دیگر اسامیوں میں آڈٹ اسسٹنٹ، سٹینوگرافر، لائبریرین، جونیئر ٹیکنیشن، وائرلیس آپریٹر، لیب اسسٹنٹ اور سرویئر کی آسامیاں شامل ہیں۔
نیشنل جابز پورٹل پر آن لائن اپلائی کرنے کا طریقہ
ان تمام اسامیوں پر درخواست جمع کرانے کے لیے 12 نومبر 2026 کی آخری تاریخ مقرر کی گئی ہے۔ واپڈا انتظامیہ نے واضح کیا ہے کہ دستی طور پر یا بذریعہ ڈاک بھیجی جانے والی کوئی بھی درخواست قابلِ قبول نہیں ہوگی۔ خواہش مند امیدواروں کو نیشنل جابز پورٹل کی آفیشل ویب سائٹ پر جانا ہوگا اور وہاں بلوچستان جابز کے سیکشن میں جا کر اپنی تعلیمی قابلیت اور مطلوبہ تجربے کے مطابق متعلقہ اسامی کا انتخاب کر کے آن لائن فارم پُر کرنا ہوگا۔
