دنیا کی مقبول ترین میسجنگ ایپ واٹس ایپ (WhatsApp) نے اپنے اینڈرائیڈ اور آئی او ایس (iOS) صارفین کے لیے چار گیم چینجر خصوصیات کا باضابطہ اعلان کیا ہے۔ ان نئے واٹس ایپ گروپ فیچرز کا بنیادی مقصد مصروف اور بڑے گروپس میں ہونے والی گفتگو کو منظم کرنا، اہم اعلانات کو محفوظ بنانا اور نئے ممبران کے لیے پرانی چیٹ تک رسائی کو انتہائی آسان بنانا ہے۔ یہ اپڈیٹس دنیا بھر میں مرحلہ وار رول آؤٹ کی جا رہی ہیں۔
گروپ اسٹیٹس (Group Status) اپڈیٹ
اب تک واٹس ایپ پر لگایا جانے والا اسٹیٹس تمام منتخب کانٹیکٹس کو نظر آتا تھا لیکن اس نئے فیچر کے تحت آپ صرف کسی ایک مخصوص گروپ کے ممبران کے لیے علیحدہ اسٹیٹس لگا سکتے ہیں۔ گروپ ممبران اس اسٹیٹس کو دیکھ بھی سکیں گے اور اس پر ری ایکٹ (React) بھی کر سکیں گے۔ عام اسٹیٹس کی طرح یہ گروپ اسٹیٹس بھی ٹھیک چوبیس (24) گھنٹے بعد خودکار طریقے سے غائب ہو جائے گا جو کسی گروپ میں تصاویر یا فوری اعلانات شیئر کرنے کا بہترین طریقہ ہے۔
میسجز کو ہمیشہ کے لیے پن کرنے کی سہولت
اس سے قبل واٹس ایپ گروپس میں کسی بھی میسج کو پن (Pin) کرنے کے لیے 24 گھنٹے، 7 دن یا 30 دن کی آخری حد مقرر تھی جس کے بعد وہ خود بخود ان پن ہو جاتا تھا۔ اب واٹس ایپ نے یہ وقت کی حد مستقل طور پر ختم کر دی ہے۔ نئے ورژن میں ایڈمنز یا ممبران کسی بھی اہم معلومات جیسے کہ ایڈریس، میٹنگ مینیفیٹو یا رولز کو ہمیشہ کے لیے پن رکھ سکتے ہیں، جس سے ممبران کو بار بار ایک ہی میسج پن کرنے کی زحمت نہیں اٹھانی پڑے گی۔
گروپ میں شمولیت کے بعد پرانی ہسٹری شیئرنگ
پہلے سے موجود گروپ میسج ہسٹری فیچر میں واٹس ایپ نے بڑی توسیع کی ہے۔ اب اگر کوئی نیا ممبر گروپ جوائن کر لیتا ہے تو گروپ کا کوئی بھی پرانا ممبر اس نئے ممبر کے نام پر ٹیپ کر کے ماضی میں ہونے والی گفتگو (چیٹ ہسٹری) اس کے ساتھ شیئر کر سکتا ہے۔ اس سے نئے آنے والے شخص کو گروپ کا پس منظر سمجھنے میں مدد ملے گی اور کسی کو انفرادی میسج فارورڈ کرنے کی ضرورت نہیں پڑے گی۔ واٹس ایپ کے مطابق یہ تمام شیئرڈ میسجز اینڈ ٹو اینڈ انسکرپٹڈ (End-to-End Encrypted) اور مکمل محفوظ ہوں گے۔
مینشنز اور ریپلائیز کا نیا چیٹ فلٹر
اگر آپ بہت سے ایکٹو واٹس ایپ گروپس کا حصہ ہیں تو یہ فیچر آپ کے لیے ہے۔ واٹس ایپ نے "Mentions and Replies” کے نام سے ایک نیا فلٹر متعارف کرایا ہے۔ اس فلٹر پر کلک کرتے ہی آپ کو صرف وہی گروپ چیٹس نظر آئیں گی جہاں کسی ممبر نے آپ کو نام لے کر ٹیگ (@) کیا ہوگا آپ کے کسی میسج کا ڈائریکٹ جواب دیا ہوگا یا پورے گروپ کو مطلع کرنے کے لیے "@all” کا استعمال کیا ہوگا۔ اس سے آپ گھنٹوں اسکرولنگ کیے بغیر براہِ راست اپنے کام کی چیٹ تک پہنچ سکیں گے۔
