پنجاب بھر کے طلبہ اور والدین کے لیے خوشخبری ہے۔ محکمہ اسکول ایجوکیشن پنجاب نے سرکاری اور نجی تعلیمی اداروں کی گرمیوں کی چھٹیوں میں توسیع کا باضابطہ اعلان کر دیا ہے جس سے بچوں کو مزید وقت گھر پر گزارنے کا موقع ملے گا۔
محکمہ کی جانب سے 7 اگست کو جاری نوٹیفکیشن میں کہا گیا ہے کہ گرمیوں کی چھٹیاں جو پہلے اگست کے وسط میں ختم ہونی تھیں اب 14 اگست سے بڑھا کر 31 اگست 2025 تک کر دی گئی ہیں۔ تمام اسکول پیر یکم ستمبر 2025 کو دوبارہ کھلیں گے اور تعلیمی سرگرمیاں معمول کے مطابق شروع ہو جائیں گی۔
محکمہ کے مطابق یہ فیصلہ "Competent Authority” کی منظوری سے کیا گیا ہے اور یہ 20 مئی 2025 کو جاری ہونے والے پچھلے نوٹیفکیشن کا تسلسل ہے۔ اس توسیع کا اطلاق پنجاب اسکول ایجوکیشن ڈیپارٹمنٹ کے دائرہ اختیار میں آنے والے تمام سرکاری و نجی اسکولوں پر ہوگا۔ ڈسٹرکٹ ایجوکیشن اتھارٹیز (DEAs) کے چیف ایگزیکٹو آفیسرز کو ہدایت دی گئی ہے کہ وہ نئے شیڈول پر سختی سے عمل درآمد کو یقینی بنائیں۔
پنجاب بھر کے سرکاری و نجی اسکولوں کی گرمیوں کی چھٹیاں 1 ستمبر تک بڑھا دی گئی ہیں، تمام بچوں کو مبارک ہو، والدین فکر نہ کریں، یہ وقت بھی گزر جائے گا۔
— Asad Nizami (@asadnizami88) August 8, 2025
یہ اعلان ایک ایسے وقت میں سامنے آیا ہے جب صرف ایک دن قبل سوشل میڈیا پر ایک جعلی نوٹیفکیشن تیزی سے پھیل گیا تھا جس میں دعویٰ کیا گیا تھا کہ گرمیوں کی چھٹیاں بڑھا دی گئی ہیں۔ اس وقت محکمہ اسکول ایجوکیشن نے فوری وضاحت کرتے ہوئے اس خبر کو بے بنیاد قرار دیا تھا اور عوام کو مشورہ دیا تھا کہ صرف سرکاری ذرائع سے تصدیق شدہ معلومات پر یقین کریں۔
اب 7 اگست کے اس نئے نوٹیفکیشن کے بعد تمام قیاس آرائیاں ختم ہو گئی ہیں اور واضح ہو گیا ہے کہ پنجاب کے اسکول اب اگست کے آخر تک بند رہیں گے جس کے بعد یکم ستمبر سے باقاعدہ کلاسز شروع ہوں گی۔
یہ بھی پڑھیں: پاکستان میں پی ٹی سی ایل کا ان لمیٹڈ انٹرنیٹ پیکیج کیسے ایکٹیویٹ کریں؟
