پاکستانی فلم میکر کامران فائق کی شارٹ فلم دی لاسٹ گلانس نے بین الاقوامی سطح پر بڑی کامیابی سمیٹتے ہوئے اکیڈمی ایوارڈز کی لانگ لسٹ کے لیے جگہ بنا لی ہے۔ یہ اعزاز فلم کو سیئٹل میں منعقدہ 21 ویں تصویر فلم فیسٹیول میں جیوری ایوارڈ برائے بہترین شارٹ فلم جیتنے کے بعد حاصل ہوا۔ اس فیسٹیول سے آسکرز کی دوڑ میں شامل ہونے والی یہ واحد فلم ہے۔
فلم دی لاسٹ گلانس کی کہانی اور کاسٹ
اس فلم کی کہانی ایک ایسے خاندان کے گرد گھومتی ہے جو تشدد سے بچنے کے لیے آدھی رات کو اپنا گاؤں چھوڑنے پر مجبور ہو جاتا ہے۔ فلم کی شاندار کاسٹ میں عدنان شاہ ٹیپو، اریج ایوب اور فہد ہاشمی شامل ہیں۔ کامران فائق نے اسے خود لکھا، ڈائریکٹ اور پروڈیوس کیا ہے جبکہ ارمینا رانا خان اس کی کو-پروڈیوسر ہیں۔ فلم میکر نے واضح کیا کہ فلم نے ابھی صرف مقابلے کی اہلیت حاصل کی ہے فائنل نامزدگی کے لیے مہم جاری ہے۔
عالمی فلم فیسٹیولز میں دیگر کامیابیاں
اس فلم نے کینیڈا کے موزیک انٹرنیشنل ساؤتھ ایشین فلم فیسٹیول میں بھی بہترین بین الاقوامی شارٹ فلم کا ایوارڈ جیتا ہے۔ اس کے علاوہ لاس اینجلس کے ایشیائی ورلڈ فلم فیسٹیول میں 50 سے زائد ممالک کی فلموں میں سے اسے ٹاپ 8 فائنلسٹ میں شامل کیا گیا ہے۔ یہ کامیابیاں عالمی سطح پر پاکستانی سنیما کی بڑھتی ہوئی پہچان کی عکاس ہیں۔
