حضرت امام حسین رضی اللہ عنہ اور ان کے ساتھیوں کی عظیم قربانی کی یاد میں 9 محرم الحرام آج (منگل) کا دن ملک بھر میں عقیدت و احترام سے منایا جا رہا ہے۔
تمام چھوٹے بڑے شہروں میں سیدنا امام حسین رضی اللہ عنہ کی یاد میں محافل کا انعقاد کیا جائے گا جبکہ بعض شہروں میں تعزیہ اور جلوس بھی نکالے جائیں گے۔
اسلام آباد پولیس نے 9 محرم الحرام کے لیے تفصیلی سیکیورٹی اور ٹریفک مینجمنٹ پلان کو حتمی شکل دے دی ہے۔
تفصیلات کے مطابق 9 محرم الحرام کا مرکزی جلوس جی/6-2 میں مین امام بارگاہ سے شروع ہوگا جو اپنے مقررہ راستے پر چل کر اپنے نقطہ آغاز پر واپس آئے گا۔
جلوس کی روانی کو یقینی بنانے کے لیے ٹریفک کے سخت انتظامات کیے گئے ہیں۔
فضل حق روڈ پولی کلینک سے کلثوم پلازہ تک سڑک عام ٹریفک کے لیے بند رہے گی۔ شہریوں کو کلثوم پلازہ سے چائنہ چوک تک جناح ایونیو استعمال کرنے کی ہدایت کی گئی ہے۔
صدر روڈ اقبال ہال اور میلوڈی چوک کے درمیان دونوں اطراف سے بند رہے گی۔
شہری ابپارہ سہروردی روڈ کو متبادل کے طور پر استعمال کر سکتے ہیں۔
شہریوں سے گزارش ہے کہ جلوس کے دوران متبادل راستے استعمال کریں اور ٹریفک کی روانی کو یقینی بنانے کے لیے ٹریفک پولیس کے ساتھ تعاون کریں۔
