فیڈرل بورڈ آف ریونیو (FBR) نے ملک بھر کے ٹیکس دہندگان کے لیے ایک انتہائی اہم اور غیر معمولی ریلیف اسکیم کا باضابطہ نوٹیفیکیشن جاری کر دیا ہے۔ نئے قانون کے تحت وہ تمام افراد جو اپنے انکم ٹیکس گوشوارے مقررہ یا توسیع شدہ تاریخ کے بعد جمع کروائیں گے وہ اب 25,000 روپے کا بھاری سرچارج (جرمانہ) ادا کیے بغیر ایکٹو ٹیکس پیئر لسٹ (ATL) کا حصہ بن سکتے ہیں۔ تاہم اس فیس ویور (قرض معافی/رعایت) کو حاصل کرنے کے لیے ایف بی آر نے جائیداد کی خرید و فروخت سے متعلق ایک سخت شرط عائد کی ہے۔
فارم اے ٹی ایل-یو (Form ATL-U) اور جائیداد پر 6 ماہ کی پابندی
ایف بی آر کی جانب سے منگل کے روز جاری کیے گئے نوٹیفیکیشن SRO 2097(I)/2026 کے تحت انکم ٹیکس رولز 2022 میں ترمیم کی گئی ہے۔ اس اسکیم کا مسودہ پہلے 6 اکتوبر 2026 کو جاری کیا گیا تھا، جسے اب باضابطہ طور پر نافذ کر دیا گیا ہے۔
لیٹ فائلرز کے لیے جرمانے کے بغیر اے ٹی ایل میں شمولیت حاصل کرنے کا طریقہ کار اور شرائط درج ذیل ہیں:
حلف نامہ: لیٹ فائلرز کو ایف بی آر کے آئیرس (IRIS) سسٹم کے ذریعے آن لائن فارم ATL-U جمع کروانا ہوگا۔
پراپرٹی کی خریداری پر پابندی: اس فارم کے تحت ٹیکس دہندہ اس بات کا قانونی حلف دے گا کہ وہ فارم جمع کروانے کی تاریخ سے اگلے 6 ماہ تک کوئی بھی جائیداد، پلاٹ، یا مکان نہیں خریدے گا اور نہ ہی کسی پراپرٹی میں مالکانہ یا نفع بخش شراکت داری حاصل کرے گا۔
فوری ایکٹو اسٹیٹس: جیسے ہی یہ فارم کامیابی سے جمع ہوگا آئیرس سسٹم کی طرف سے الیکٹرانک تصدیق نامہ جاری کر دیا جائے گا اور شہری کا نام بغیر 25,000 روپے دیے فوری طور پر اے ٹی ایل میں شامل ہو جائے گا جس سے اس کا ودہولڈنگ ٹیکس آدھا ہو جائے گا۔
ایف بی آر کی لائیو مانیٹرنگ اور جرمانے کی واپسی
ایف بی آر نے واضح کیا ہے کہ حلف نامہ جمع کروانے والے شہریوں کے ڈیٹا کی سخت اسکریننگ کی جائے گی۔ ٹیکس ڈپارٹمنٹ اپنے اندرونی سسٹمز، صوبائی جائیداد کی رجسٹریوں، پٹوار خانوں، بینکوں اور دیگر سرکاری اداروں جیسے نادرا اور سی ڈی اے کے لائیو ریکارڈز کے ذریعے مانیٹر کرے گا کہ آیا متعلقہ شخص نے ان 6 مہینوں کے دوران کوئی پراپرٹی تو نہیں خریدی۔
اگر تحقیقات کے دوران یہ ثابت ہو گیا کہ شہری نے حلف نامے کی خلاف ورزی کرتے ہوئے ممنوعہ مدت کے دوران کوئی جائیداد اپنے نام کی ہے تو ایف بی آر پہلے اسے سسٹم کے ذریعے آن لائن وضاحت کا موقع فراہم کرے گا۔ اگر برانچ یا رجسٹری سے خلاف ورزی کی تصدیق ہو جاتی ہے تو ٹیکس دہندہ کو دی گئی فیس کی یہ رعایت فوری طور پر واپس لے لی جائے گی اس کا نام فائلر لسٹ (ATL) سے نکال دیا جائے گا اور اس پر پرانے رولز کے تحت جرمانے اور نان فائلر کے تمام ٹیکسز دوبارہ لاگو کر دیے جائیں گے۔
