ذرائع کے مطابق منگل کو نیوزی لینڈ کے خلاف پاکستان کی ہوم ٹی ٹوئنٹی سیریز کے لیے ٹیم کا اعلان کیا جا سکتا ہے۔
تفصیلات کے مطابق 18 رکنی اسکواڈ کا اعلان آج ہونا تھا لیکن اب اس میں تاخیر ہو گئی ہے کیونکہ کھلاڑی آج رات چیف آف آرمی سٹاف جنرل عاصم منیر کی طرف سے دیے گئے افطار ڈنر میں شرکت کریں گے۔
نیوزی لینڈ کے خلاف سیریز سے قبل ٹیم 14 اپریل کو اسلام آباد میں جمع ہوگی۔
بابر اعظم، عثمان خان، عماد وسیم، محمد عامر، عرفان خان نیازی، صائم ایوب، محمد رضوان، شاداب خان، افتخار احمد، اعظم خان، شاہین آفریدی، نسیم شاہ اور زمان خان کے سکواڈ کا حصہ ہونے کی توقع ہے۔ آغا سلمان، صاحبزادہ فرحان، فخر زمان، محمد وسیم جونیئر اور عباس آفریدی کے بھی ٹیم میں شامل کیے جانے کا امکان ہے۔
سیریز کے لیے ابرار احمد اور اسامہ میر میں سے ایک کو بھی اسکواڈ میں شامل کیا جائے گا۔
کیا حارث رؤوف ٹیم کا حصہ ہوں گے؟
پاکستان سپر لیگ (پی ایس ایل) کے سیزن نو کے دوران انجری کا شکار ہونے والے فاسٹ بولر حارث رؤف مکمل طور پر فٹ نہیں ہیں اور وہ اسکواڈ کا حصہ نہیں ہوں گے۔
نیوزی لینڈ کے خلاف سیریز کے لیے پاکستانی کوچنگ اسٹاف کا اعلان بھی ایک دو روز میں کر دیا جائے گا۔
دونوں ٹیمیں 18، 20 اور 21 اپریل کو پنڈی کرکٹ سٹیڈیم راولپنڈی میں تین ٹی ٹوئنٹی میچ کھیلیں گی۔ اس کے بعد، دونوں ٹیمیں لاہور چلی جائیں گی جہاں وہ بالترتیب 25 اور 27 اپریل کو سیریز کے بقیہ دو ٹی ٹوئنٹی کھیلیں گی۔
دوسری جانب مائیکل بریسویل کی قیادت میں نیوزی لینڈ کا سکواڈ جمعہ (12 اپریل) کو پاکستان کے لیے روانہ ہوگا۔
ٹرینٹ بولٹ، ڈیون کونوے، لوکی فرگوسن، میٹ ہنری، ڈیرل مچل، گلین فلپس، راچن رویندرا، مچ سینٹنر اور کین ولیمسن انڈین پریمیئر لیگ کی وجہ سے سیریز میں شامل نہیں ہوں گے۔
دورہ پاکستان کے لیے نیوزی لینڈ کا ٹی ٹوئنٹی سکواڈ
مائیکل بریسویل (سی)، فن ایلن، مارک چیپ مین، جوش کلارکسن، جیکب ڈفی، ڈین فاکس کرافٹ، بین لِسٹر، کول میک کونچی، ایڈم ملنے، جمی نیشام، ول اوورکے، ٹم رابنسن، بین سیئرز، ٹم سیفرٹ ایش سودھی
