دفتر خارجہ پاکستان نے اقوامِ متحدہ میں بھارت کی جانب سے دیے گئے غیر سفارتی اور غیر ذمہ دارانہ بیانات کو دوٹوک الفاظ میں مسترد کر دیا ہے۔ جمعہ کے روز اسلام آباد میں ہفتہ وار میڈیا بریفنگ سے خطاب کرتے ہوئے ترجمان دفتر خارجہ سجاد حیدر خان نے کہا کہ پاکستان کے معدنی وسائل پر بھارتی بیانات مسترد کرتے ہیں کیونکہ یہ بے بنیاد الزامات کسی توجہ کے مستحق نہیں اور اسی اجلاس کے دوران پاکستانی مندوب نے ان کا فوری اور مؤثر جواب دے دیا تھا۔ ترجمان نے واضح کیا کہ یہ ریمارکس پاکستان کے اندرونی معاملات میں ناقابلِ قبول مداخلت اور اقوامِ متحدہ کے چارٹر کے منافی ہیں۔
آبی دہشت گردی، مقبوضہ کشمیر اور بھارتی اقلیتوں پر پاکستان کا شدید ردعمل
ترجمان دفتر خارجہ نے کہا کہ بھارت پاکستان کی جانب سے بھارتی آبی دہشت گردی پر اٹھائے گئے جائز خدشات کا جواب دینے کے بجائے پاکستانی اداروں اور قیادت کے خلاف من گھڑت الزامات کا سہارا لے رہا ہے۔ انہوں نے کہا کہ پاکستان کے معدنی وسائل کی ترقی کے خلاف بھارتی دشمنی ملک کے استحکام کو نقصان پہنچانے کی مسلسل کوششوں سے عیاں ہے۔
سجاد حیدر خان نے بھارت کو آئینہ دکھاتے ہوئے درج ذیل اہم نکات اٹھائے:
مقبوضہ کشمیر اور سلامتی کونسل کی قراردادیں: اقوامِ متحدہ کے پلیٹ فارم کو جھوٹ پھیلانے کے لیے استعمال کرنے کے بجائے بھارت جموں و کشمیر پر سلامتی کونسل کی قراردادوں کے تحت اپنی ذمہ داریاں پوری کرے، جہاں بھارتی قابض افواج دہائیوں سے انسانی حقوق کی سنگین خلاف ورزیاں کر رہی ہیں۔
اقلیتوں سے امتیازی سلوک: ایک ایسا ملک جو اقوامِ متحدہ کے چارٹر، ہمسایہ ممالک کی خودمختاری اور بین الاقوامی معاہدوں کی مسلسل خلاف ورزی کرتا ہے اور جو اپنی مسلمان، سکھ، عیسائی اور دلت اقلیتوں کے خلاف منظم امتیازی سلوک کی سرپرستی کرتا ہے اسے دوسروں پر انگلی اٹھانے کا کوئی اخلاقی جواز حاصل نہیں۔
بابا گرونانک جنم دن کی تقریبات اور ای سی او اجلاس میں افغانستان کی عدم شرکت
بریفنگ کے دوران دیگر سوالات کے جوابات دیتے ہوئے ترجمان دفتر خارجہ نے اہم سفارتی امور پر بھی روشنی ڈالی:
سکھ یاتریوں کی آمد: سجاد حیدر خان نے بتایا کہ بابا گرونانک کے جنم دن کی تقریبات میں شرکت کے لیے بھارت سے تقریباً 2,700 سکھ یاتریوں کی پاکستان آمد متوقع ہے۔
ای سی او اجلاس اور افغانستان: انہوں نے واضح کیا کہ اسلام آباد میں منعقدہ ای سی او (ECO) اجلاس میں افغانستان کو مدعو نہیں کیا گیا کیونکہ پاکستان نے تاحال موجودہ افغان حکومت کو تسلیم نہیں کیا اور ای سی او سیکرٹریٹ میں افغانستان کی رکنیت بھی معطل ہے۔ ترجمان نے مزید کہا کہ پاکستان ایک پرامن اور مستحکم افغانستان کا خواہاں ہے تاہم بامعنی پیش رفت کے لیے افغان حکام کو ہمسایہ ممالک کے جائز سیکیورٹی خدشات، بالخصوص افغان سرزمین سے پھیلنے والی دہشت گردی کے خطرے کا خاتمہ کرنا ہوگا۔






