کراچی میں مون سون کی تازہ لہر کے تحت 4 سے 7 اگست کے درمیان شدید بارشوں کی پیش گوئی کی گئی ہے۔ محکمہ موسمیات کے مطابق، بحیرہ عرب اور خلیج بنگال سے آنے والی مون سون ہوائیں کراچی میں داخل ہو رہی ہیں جو کہ گزشتہ سسٹم سے زیادہ شدت رکھ سکتی ہیں۔
محکمہ موسمیات کے چیف میٹرولوجسٹ سردار سرفراز کا کہنا ہے کہ 5 سے 7 اگست کے دوران کراچی میں شدید بارشوں کا امکان ہے۔ اس کے علاوہ شہر کے مختلف علاقوں میں ہلکی بارش اور بوندا باندی جاری رہے گی۔
پچھلے چوبیس گھنٹوں کے دوران کراچی کے مختلف علاقوں میں بارش ریکارڈ کی گئی ہے، جس میں گڈاپ میں سب سے زیادہ 56.7 ملی میٹر بارش ہوئی۔
کراچی میں ہوا کے کم دباؤ کے باعث بادل چھائے رہنے کا امکان ہے اور شہر کے درجہ حرارت میں ہلکا سا اضافہ ہوگا، جو 33 سے 35 ڈگری سیلسیئس کے درمیان رہ سکتا ہے۔
محکمہ موسمیات نے خبردار کیا ہے کہ شدید بارشوں کی وجہ سے کراچی، حیدرآباد، ٹھٹھہ، بدین اور دیگر ساحلی علاقوں میں شہری سیلاب کا خطرہ ہے۔ اس کے علاوہ تیز ہواؤں کی وجہ سے کمزور ڈھانچے کو نقصان پہنچ سکتا ہے۔
