آئمہ بیگ نے انسٹاگرام پر ایک مختصر مگر جذباتی پوسٹ میں سب کو حیران کر دیا ہے۔ انہوں نے لکھا ہے: "کل رات اپنے بہترین دوست سے شادی کی، الحمدللہ۔” ان الفاظ سے ان کی خوشی صاف جھلک رہی تھی۔
ان کی شادی کسی بڑی تقریب کی طرح نہیں ہوئی نہ کوئی میڈیا تھا نہ شور شرابا۔ بس کینیڈا میں ایک چھوٹی سی تقریب تھی جہاں صرف قریبی دوست اور خاندان کے لوگ موجود تھے۔ ایک سادہ اور دل سے جڑی ہوئی تقریب جس میں دکھاوا نہیں بلکہ محبت اصل مرکز تھی۔
آئمہ نے بتایا کہ وہ اس وقت کافی جذباتی اور مصروف ہیں اس لیے فی الحال زیادہ تصاویر شیئر نہیں کر رہیں۔ لیکن انہوں نے وعدہ کیا کہ ان شاء اللہ جلدی مزید تصاویر بھی آئیں گی۔
لوگوں نے ان دونوں کے بارے میں قیاس آرائیاں پہلے ہی سے شروع کر دی تھیں۔ خاص طور پر پچھلے سال جب آئمہ نے انسٹاگرام پر زین کے ساتھ کچھ تصاویر شیئر کیں۔ ان میں سے ایک تصویر میں دونوں نے ملتے جلتے لاکٹ پہن رکھے تھے اور ساتھ دل کے تین ایموجیز بھی لگائے تھے یہ سب دیکھ کر فینز کو کافی اندازے ہو گئے تھے۔
آئمہ بیگ نے اپنی پہچان فلم لاہور سے آگے کے گانے سے بنائی۔ اس کے بعد وہ کوک اسٹوڈیو پر آئیں اور عاطف اسلم جیسے بڑے فنکاروں کے ساتھ بھی گایا۔ فلم پرے ہٹ لو کے گانوں میں بھی ان کی آواز شامل تھی۔
دوسری طرف زین احمد فیشن کی دنیا میں جانا پہچانا نام ہیں۔ انہوں نے 2018 میں راستہ کے نام سے لاہور میں ایک اسٹریٹ ویئر برانڈ کی بنیاد رکھی۔ یہ برانڈ خاص اس لیے ہے کیونکہ یہ مقامی ہنر مند کاریگروں سے ہاتھ سے تیار کردہ کپڑوں کو محدود مقدار میں پیش کرتا ہے۔ راستہ صرف پاکستان تک محدود نہیں رہا — اسے Vogue جیسے عالمی میگزین میں جگہ ملی اور جسٹن بیبر، فرنچ مونٹانا اور رض احمد جیسے مشہور افراد نے بھی اس برانڈ کو پہنا ہے۔
اب جب کہ آئمہ اور زین ایک نئے سفر کی شروعات کر چکے ہیں فینز اور چاہنے والے ان کے لیے دعائیں اور محبتیں بھیج رہے ہیں۔
یہ بھی پڑھیں : صنم سعید اور محب مرزا کے ہاں بیٹے کی پیدائش
