برطانوی حکومت نے پادریوں، مبلغین اور مذہبی رہنماؤں کے لیے منسٹر آف ریلیج (Minister of Religion) ویزا کے قوانین میں متعدد اہم ترامیم متعارف کروا دی ہیں۔ برطانوی ہوم آفس کی جانب سے جاری کردہ نئی گائیڈ لائنز کے مطابق اس ویزا کیٹیگری میں سب سے بڑی تبدیلی سابقہ چھ سال کی زیادہ سے زیادہ قیام کی حد کا خاتمہ ہے جس سے اب مذہبی اسکالرز طویل عرصے تک برطانیہ میں خدمات سرانجام دے سکیں گے۔
پوائنٹس سسٹم، تعلیمی معیار اور مالیاتی شرائط
نئے قوانین کے تحت اس ویزا کے حصول کے لیے امیدواروں کو مجموعی طور پر 70 پوائنٹس حاصل کرنا لازمی ہوں گے۔ ان پوائنٹس کی تقسیم کچھ یوں ہے کہ ایک درست سرٹیفکیٹ آف اسپانسرشپ (CoS) کے 50 پوائنٹس، مالیاتی خود کفالت کے 10 پوائنٹس اور انگریزی زبان کی مہارت (B2 لیول) ثابت کرنے کے 10 پوائنٹس شامل ہیں۔ مالیاتی شرط کے مطابق اے-ریٹڈ (A-rated) اسپانسر کو ملازمت کے پہلے مہینے کے دوران کم از کم 1,270 برطانوی پاؤنڈز کی مالی مدد فراہم کرنی ہوگی تاہم جو لوگ پہلے ہی 12 ماہ سے برطانیہ میں قانونی طور پر مقیم ہیں وہ اس مالیاتی شرط سے مستثنیٰ ہوں گے۔
کام کے حقوق اور مستقل رہائش کا طریقہ کار
کامیاب درخواست گزاروں کو ڈیجیٹل ای ویزا (eVisa) جاری کیا جائے گا جو ان کے یو کے وی آئی (UKVI) اکاؤنٹ کے ذریعے قابلِ رسائی ہوگا۔ ویزا ہولڈرز کو اپنے خاندان (شریکِ حیات اور بچوں) کو برطانیہ لانے کی اجازت ہوگی۔ وہ اپنے بنیادی مذہبی فرائض کے علاوہ ہفتے میں 20 گھنٹے تک اضافی کام بھی کر سکتے ہیں بشرطیکہ وہ کام اسی پیشہ ورانہ سطح کا ہو۔ یہ ویزا روٹ پانچ سال کا مسلسل قیام مکمل کرنے کے بعد مستقل رہائش (ILR) یعنی پکا ویزا حاصل کرنے کا سیدھا راستہ بھی فراہم کرتا ہے جس کے لیے لائف ان دی یوکے ٹیسٹ پاس کرنا لازمی ہوگا۔
