یورپی ملک مالٹا نے اپنے مشہور ریٹائرمنٹ ویزا پروگرام میں بڑے پیمانے پر تبدیلیاں کرنے کا باضابطہ اعلان کیا ہے جس کے تحت غیر ملکی ریٹائرڈ افراد کے لیے سالانہ ٹیکس، پراپرٹی کی خریداری، کرایہ داری اور ویزا فیس کی حد میں بھاری اضافہ کر دیا گیا ہے۔ یہ تمام تبدیلیاں ‘لیگل نوٹس 195 آف 2026’ کے تحت متعارف کروائی گئی ہیں، جن کا باقاعدہ نفاذ یکم جنوری 2027 سے پورے ملک میں ہوگا۔
ریٹائرمنٹ ٹیکس اور جائیداد کی قیمتوں میں بڑا اضافہ
نئے قواعد و ضوابط کے تحت، مالٹا میں رہائش پذیر ہونے والے غیر ملکی پنشنرز کے لیے سالانہ کم از کم ٹیکس کی حد 7,500 یورو سے دوگنی کر کے 15,000 یورو کر دی گئی ہے۔ اس کے ساتھ ہی مالٹا میں مستقل گھر خریدنے کی کم از کم شرط موجودہ 2 لاکھ 75 ہزار یورو سے بڑھا کر 7 لاکھ یورو مقرر کی گئی ہے۔
وہ افراد جو جائیداد خریدنے کے بجائے کرائے پر گھر لینے کا انتخاب کریں گے ان کے لیے سالانہ کم از کم کرایے کی حد کو بڑھا کر 14,000 یورو کر دیا گیا ہے۔ مزید برآں ویزا اپلائی کرنے کی سرکاری فیس بھی 2,500 یورو سے بڑھا کر 8,500 یورو کر دی گئی ہے۔ اس نئے قانون کے تحت پرانے مالٹا ریٹائرمنٹ پروگرام کو ختم کر کے ایک نیا ریٹائرڈ پنشنر اسٹیٹس متعارف کروایا جا رہا ہے جس کی ابتدائی مدت 5 سال ہوگی اور اس میں مزید 5 سال کی توسیع کی جا سکے گی۔ تاہم جو لوگ 31 دسمبر 2026 تک اپنی درخواستیں جمع کروا دیں گے وہ سنہ 2031 کے آخر تک پرانے سستے قوانین کے تحت ہی فائدہ اٹھانے کے اہل رہیں گے۔
کون سے لوگ اس ویزا پروگرام کے لیے اہل ہیں؟
مالٹا کے نئے ویزا قوانین کے مطابق اس پروگرام کے لیے یورپی یونین (EU) اور غیر یورپی یونین (بشمول پاکستان اور دیگر ممالک) کے ریٹائرڈ شہری اپلائی کر سکتے ہیں۔ درخواست گزاروں کے لیے درج ذیل شرائط پر پورا اترنا لازمی ہے:
پنشن کی شرط: امیدوار کی قابلِ ٹیکس آمدنی کا کم از کم 75 فیصد حصہ پنشن پر مشتمل ہونا چاہیے اور وہ پوری پنشن مالٹا کے بینک اکاؤنٹ میں وصول کرتا ہو۔
قیام کی مدت: پانچ سال کے دوران امیدوار کے لیے سالانہ اوسطاً کم از کم 90 دن مالٹا میں گزارنا لازمی ہے اور وہ کسی دوسرے ایک ملک میں سال میں 183 دن سے زیادہ قیام نہ کرتا ہو۔
انشورنس اور ملازمت پر پابندی: ریٹائرڈ افراد کے لیے پرائیویٹ ہیلتھ انشورنس برقرار رکھنا لازمی ہے، اور وہ ملک میں کسی قسم کی باقاعدہ ملازمت نہیں کر سکتے البتہ فلاحی یا غیر ایگزیکٹو سرگرمیوں کی اجازت ہوگی۔
تمام درخواستیں نادرا یا مالٹا کی امیگریشن کے منظور شدہ مجاز نمائندے کے ذریعے ہی جمع ہوں گی، جس کے ساتھ پولیس کلیئرنس سرٹیفکیٹ، پنشن کے ثبوت اور ہیلتھ انشورنس منسلک کرنا لازمی ہوگا۔ اسکریننگ اور بیک گراؤنڈ چیک کے بعد ویزا پروسیسنگ میں عام طور پر 2 سے 4 ماہ کا وقت لگتا ہے۔
