پاکستان کے کیوسٹ اسجد اقبال نے ایک شاندار کارکردگی کا مظاہرہ کرتے ہوئے بھارت کے مالکیت سنگھ کو شکست دے کر IBSF ورلڈ سکس ریڈ اسنوکر چیمپئن شپ 2024 کے فائنل میں جگہ بنا لی۔ یہ مقابلہ منگولیا کے شہر اُلان باتر میں ہوا جہاں اسجد نے سیمی فائنل میں 6-0 کی شاندار جیت حاصل کی۔
اس مقابلے میں اسجد اقبال نے ابتدا سے ہی اچھا پریشر رکھا، پہلا فریم 49-18 سے جیتا اور پھر لگاتار دیگر فریمز میں بھی کامیابیاں سمیٹیں، جن میں 38-34، 46-13، 40-31، 52-13 اور آخری فریم 45-0 بھی جیت گئے۔ بھارتی کھلاڑی سنگھ پورے میچ میں کوئی خاص مزاحمت نہ کر سکے اور ایک بھی فریم جیتنے میں ناکام رہے۔
اس سے قبل، کوارٹر فائنل میں اسجد نے قبرص کے مائیکل جورجیؤ کو 5-2 سے شکست دے کر سیمی فائنل میں قدم رکھا تھا۔ اسجد کی اس شاندار جیت سے پاکستان کے اسنوکر شائقین میں امید کی نئی کرن جاگی ہے، اور اب وہ فائنل میں چیمپئن شپ جیتنے کے لیے مضبوط امیدوار سمجھے جا رہے ہیں۔
