بالی وڈ اداکارہ سوناکشی سنہا اور اداکار ظہیر اقبال نے شادی کرلی ہے۔
بھارتی میڈیا رپورٹس کے مطابق سوناکشی اور ظہیر اقبال کی شادی کی تقریب ممبئی میں اداکارہ کے گھر پر منعقد ہوئی۔ تقریب میں سوناکشی کے والد شتروگن سنہا اور والدہ پونم سنہا نے شرکت کی، تاہم بھائی شریک نہیں ہو سکے۔
سوناکشی اور ظہیر نے سرکاری اہلکار کی موجودگی میں سول میرج کی اور شادی کے کاغذات پر دستخط کیے۔ شتروگن سنہا نے بھی سول میرج کے کاغذات پر دستخط کیے اور بیٹی کو رخصت کیا۔
سوناکشی نے شادی کے موقع پر آف وائٹ ساڑھی پہن رکھی تھی جبکہ ڈائمنڈ اور موتیوں کا ہار گلے میں پہنا ہوا تھا۔
دلہا ظہیر اقبال نے بھی سفید شلوار قمیض زیب تن کر رکھی تھی۔
شادی کی تقریب کے بعد جوڑے کی جانب سے ممبئی کے ایک مقامی ریسٹورنٹ میں عشائیہ دیا جا رہا ہے جس میں فلم اور دیگر شعبوں سے تعلق رکھنے والی شخصیات شریک ہیں۔
عشائیے میں انیل کپور، چنکی پانڈے، کاجول اور دیگر نے شرکت کی جبکہ عشائیے میں اداکارہ نے سرخ رنگ کی ساڑھی زیب تن کی ہوئی تھی۔ خیال رہے کہ سوناکشی سنہا کے مسلمان دوست ظہیر اقبال سے شادی کے اعلان پر ہنگامہ برپا ہوگیا تھا اور خاندان میں اختلافات کی خبریں سامنے آئی تھیں۔
