پاکستان میں تیز ترین اور جدید ترین انٹرنیٹ کی فراہمی کے لیے ایک بہت بڑی پیش رفت سامنے آئی ہے جہاں سیکیورٹیز اینڈ ایکسچینج کمیشن آف پاکستان (SECP) نے سیٹلائٹ پر مبنی انٹرنیٹ اور خلائی سرگرمیاں سرانجام دینے کے لیے 6 بڑی کمپنیوں کی کارپوریٹ رجسٹریشن مکمل کر لی ہے۔ تاہم حکام نے واضح کیا ہے کہ کارپوریٹ رجسٹریشن کا یہ مطلب ہرگز نہیں ہے کہ یہ کمپنیاں پاکستان میں فوری طور پر تجارتی بنیادوں پر انٹرنیٹ خدمات کا آغاز کر سکتی ہیں۔
اسٹار لنک اور دیگر کمپنیوں کی ایس ای سی پی میں رجسٹریشن
سینیٹ کی قائمہ کمیٹی برائے کابینہ سیکریٹریٹ کو جمع کروائی گئی تفصیلی رپورٹ کے مطابق پاکستان میں رجسٹرڈ ہونے والی ان 6 کمپنیوں میں درج ذیل نام شامل ہیں:
اسٹار لنک انٹرنیٹ سروسز پاکستان
اسپیس سیل پاکستان
ایتھر ون
فلائی ناٹکس
گلیکسی اسپیس پاکستان
اسپیس پی
رپورٹ میں انکشاف کیا گیا ہے کہ ایتھر ون، فلائی ناٹکس، گلیکسی اسپیس اور اسپیس پی کو "پاکستان اسپیس ایکٹیویٹیز ریگولیٹری بورڈ” (PSARB) کے قیام کے بعد باقاعدہ رجسٹرڈ کیا گیا ہے جبکہ اسٹار لنک اور اسپیس سیل کی رجسٹریشن پہلے ہی ہو چکی تھی۔ اس سیکٹر کی مانیٹرنگ کو آسان بنانے کے لیے ایس ای سی پی نے باقاعدہ طور پر ایرواسپیس اور خلائی کاروبار کے لیے ایک بالکل الگ رجسٹریشن کیٹیگری بھی قائم کر دی ہے۔
سیکیورٹی کلیئرنس اور پاکستان میں سیٹلائٹ انٹرنیٹ سروس کا مستقبل
ایس ای سی پی کی رپورٹ کے مطابق تجارتی آغاز کے لیے کمپنیوں کو پی ایس اے آر بی (PSARB) کی تمام شرائط کو پورا کرنا اور وزارتِ داخلہ سے لازمی سیکیورٹی کلیئرنس حاصل کرنا ہوگی۔ اس وقت اسٹار لنک انٹرنیٹ سروسز، گلیکسی اسپیس اور اسپیس سیل پاکستان کے غیر ملکی ڈائریکٹرز اور شیئر ہولڈرز کی سیکیورٹی کلیئرنس کی درخواستیں وزارتِ داخلہ کے پاس زیرِ التوا ہیں۔
دوسری جانب ‘اسپیس پی’ (Space P) جو کہ نیشنل کمانڈ اتھارٹی (NCA) کا ایک ذیلی ادارہ ہے اسے پی ایس اے آر بی کے نو ابجیکشن سرٹیفکیٹ (NOC) کی شرط سے مکمل استثنیٰ حاصل ہے۔ پاکستان ٹیلی کمیونیکیشن اتھارٹی (PTA) ان تمام کمپنیوں کو لازمی سیکیورٹی اور ریگولیٹری تقاضے مکمل ہونے کے بعد ہی باقاعدہ تجارتی لائسنس جاری کرے گی۔ یہ معلومات سینیٹر رانا محمود الحسن کی درخواست پر کمیٹی کے سامنے پیش کی گئیں جس کے لیے ایس ای سی پی کے کارپوریٹ رجسٹری ڈیپارٹمنٹ کے سربراہ مبشر سعید سدوزئی کو فوکل پرسن مقرر کیا گیا ہے۔ جب تک یہ تمام سرکاری کلیئرنسز مکمل نہیں ہو جاتیں تب تک اسٹار لنک یا کوئی دوسری کمپنی پاکستان میں کمرشل انٹرنیٹ لانچ نہیں کر سکے گی۔
