محکمہ ٹریفک پولیس نے مملکت میں ڈرائیونگ لائسنس کے حصول کے لیے سات اہم شرائط مقرر کی ہیں۔ ان شرائط کے مطابق لائسنس کے لیے درخواست گزار کی عمر کم از کم 18 سال ہونی چاہیے، اور وہ نشہ آور اشیا کے استعمال یا فروخت کے حوالے سے عدالت سے سزا یافتہ نہ ہو۔
اس کے علاوہ، درخواست گزار کو جسمانی طور پر تندرست ہونا ضروری ہے۔ اسے ڈرائیونگ کا امتحان پاس کرنا ہوگا، لائسنس کی فیس ادا کرنی ہوگی، اور اگر کوئی پرانے چالان ہیں تو انہیں بھی ادا کرنا ہوگا۔ اس کے ساتھ، درخواست گزار کو قانونی طور پر مملکت میں مقیم یعنی کارآمد اقامہ رکھنا ہوگا۔ یہ بنیادی شرائط ہیں جو ہر صورت میں پوری کرنی لازمی ہیں۔
ٹریفک پولیس کے قانون کی شق نمبر 36 کے تحت، لائٹ ڈرائیونگ لائسنس کے لیے عمر کی حد 18 سال جبکہ ہیوی ڈرائیور کے لیے کم از کم عمر 20 سال ہونا ضروری ہے۔
ڈرائیونگ لائسنس حاصل کرنے کے دو طریقے
ڈرائیونگ لائسنس حاصل کرنے کے دو بنیادی طریقے ہیں۔ جو لوگ اپنے ملک کا ڈرائیونگ لائسنس رکھتے ہیں، ان کا لائسنس جلد جاری کیا جاتا ہے۔ ایسے افراد جن کے پاس کوئی ڈرائیونگ لائسنس نہیں ہوتا، انہیں ٹریفک پولیس کے منظور شدہ ڈرائیونگ اسکول میں مقررہ تعلیم حاصل کرنے کے بعد امتحان دینا پڑتا ہے۔
غیرملکی ڈرائیونگ لائسنس رکھنے والے تارکین وطن
وہ تارکین وطن جن کے پاس اپنے ملک کا ڈرائیونگ لائسنس ہوتا ہے، انہیں چاہیے کہ اس کا عربی میں ترجمہ کروا کر اپنے ملک کے سفارتخانے سے تصدیق کرائیں۔ بعدازاں، ٹریفک پولیس کے منظور شدہ ڈرائیونگ اسکول ’دلہ‘ کی ویب سائٹ پر رجسٹر کریں اور وہاں سے ڈرائیونگ کا امتحان دیں۔ امتحان میں کامیاب ہونے والوں کو ڈرائیونگ لائسنس جاری کر دیا جاتا ہے۔ جو افراد امتحان میں ناکام ہوتے ہیں، انہیں کم از کم 30 گھنٹے کی تربیت دی جاتی ہے جو روزانہ تین گھنٹے پر مشتمل ہوتی ہے۔
ڈرائیونگ لائسنس نہ رکھنے والے غیرملکی
وہ افراد جو غیرملکی ڈرائیونگ لائسنس نہیں رکھتے، انہیں ڈرائیونگ اسکول میں رجسٹریشن کروا کر 90 گھنٹے کی تربیت حاصل کرنا ہوتی ہے۔ یہ تربیت 30 دن پر مشتمل ہوتی ہے اور روزانہ تین گھنٹے پر محیط ہوتی ہے۔ ڈرائیونگ کی کلاسز مکمل ہونے کے بعد امتحان دینا ہوتا ہے جس میں ڈرائیونگ اور ٹریفک سائنز کا ٹیسٹ پاس کرنا ضروری ہے۔
میڈیکل ٹیسٹ
ڈرائیونگ ٹیسٹ مکمل کرنے کے بعد میڈیکل ٹیسٹ کے لیے منظور شدہ ہسپتال یا طبی مرکز سے سرٹیفکیٹ حاصل کرنا ہوتا ہے جس میں بلڈ گروپ، آنکھوں کا ٹیسٹ اور جسمانی حالت کا معائنہ شامل ہوتا ہے۔
انٹرنیشنل ڈرائیونگ لائسنس
انٹرنیشنل ڈرائیونگ لائسنس حاصل کرنے کے لیے مقررہ درخواست فارم بھر کر دو عدد تصاویر اور پاسپورٹ کی کاپی فراہم کی جاتی ہے، اور فیس ادا کرنے کے بعد ادارے سے رجوع کیا جاتا ہے جہاں سے بین الاقوامی ڈرائیونگ لائسنس جاری کیا جاتا ہے۔ انٹرنیشنل ڈرائیونگ لائسنس کسی بھی مجاز ٹریول اینڈ ٹور ایجنسی سے جاری کروایا جا سکتا ہے۔
17 سال کی عمر کے لیے ڈرائیونگ پرمٹ
قانون کے مطابق ڈرائیونگ لائسنس کے لیے عمر کی حد 18 سال مقرر ہے، تاہم 17 سال کی عمر کے نوجوانوں کے لیے ایک سال کا ڈرائیونگ پرمٹ، جسے ‘تصریح’ کہا جاتا ہے، بھی جاری کیا جا سکتا ہے۔ اس ضمن میں ٹریفک پولیس کا کہنا ہے کہ ‘تصریح’ جاری کرانے کے لیے عمر کم از کم 17 سال ہونی چاہیے۔
ڈرائیونگ پرمٹ حاصل کرنے کے لیے ڈرائیونگ اسکول میں رجسٹریشن اور میڈیکل سرٹیفکیٹ کی ضرورت ہوتی ہے جبکہ مقررہ فارم کے ساتھ چھ تصاویر منسلک کرنا ضروری ہے۔ غیرملکیوں کے لیے کارآمد اقامہ ہونا بھی لازمی شرط ہے۔
خواتین کے لیے ڈرائیونگ لائسنس کا اجرا
سعودی عرب میں خواتین کو بھی ڈرائیونگ کی اجازت دی جا چکی ہے۔ اس ضمن میں محکمہ ٹریفک کا کہنا ہے کہ جو قوانین مردوں کے لیے ہیں وہی خواتین پر بھی لاگو ہوتے ہیں۔
