امریکی محکمہ خارجہ کے ترجمان میتھیو ملر نے کہا ہے کہ امریکہ بھارت اور پاکستان کے درمیان براہِ راست مذاکرات کی حمایت کرتا ہے۔
واشنگٹن میں ایک پریس کانفرنس کے دوران ترجمان امریکی محکمہ خارجہ میتھیو ملر نے وزیر اعظم شہباز شریف کی بھارتی وزیر اعظم مودی کو مبارکباد کے حوالے سے سوال کے جواب میں بریفنگ دی۔
میتھیو ملر نے کہا کہ پاک بھارت مذاکرات کی رفتار اور دائرہ کار کا تعین انہی کو خود کرنا ہے، ہم پاکستان اور بھارت دونوں کے ساتھ اپنے تعلقات کو اہمیت دیتے ہیں۔
امریکی ترجمان نے کہا کہ علاقائی سلامتی کو درپیش خطرات سے نمٹنے میں امریکہ اور پاکستان کا مشترکہ مفاد ہے۔ ہم پاکستان کے ساتھ انسداد دہشت گردی مذاکرات کے ذریعے سیکیورٹی سے متعلق امور پر بات چیت کر رہے ہیں۔
میتھیو ملر نے مزید کہا کہ پاکستان کے ساتھ مذاکرات میں انسداد دہشت گردی کی صلاحیت کو بڑھانے کے کئی پروگرام شامل ہیں، امریکہ پاکستان ملٹری ٹو ملٹری روابط کے سلسلے کی حمایت کرتا ہے۔
