پرہجوم مقامات پر ماسک پہنیں
نیشنل کمانڈ اینڈ آپریشن سنٹر (این سی او سی) نے پرہجوم مقامات اور ہیلتھ کئیر مراکز پر ماسک پہننے کی سفارش کی ہے۔
این سی او سی کے مطابق ملک میں موجودہ کوویڈ19 کے رجحان کو مدنظر رکھتے ہوئے 30 اپریل تک کے لیے رہنما خطوط جاری کیے گئے ہیں۔
ملک میں 129 نئے کیسز رپورٹ دریں اثنا، صحت حکام نے بتایا ہے کہ ملک بھر میں گزشتہ 24 گھنٹوں کے دوران 129 نئے کورونا وائرس کیسز رپورٹ ہوئے۔
نیشنل انسٹی ٹیوٹ آف ہیلتھ کے کردہ اعداد و شمار کے مطابق، کیس مثبت تناسب 2.98 فیصد ہے جبکہ 14 مریضوں کی حالت تشویشناک ہے۔
کوویڈ 19 سے کسی کی موت کی اطلاع نہیں ملی جبکہ 4,334 ٹیسٹ کیے گئے۔
لاہور میں 523 ٹیسٹ کیے گئے جن میں سے 8.22 فیصد کے تناسب سے 43 کیسز کی تصدیق ہوئی جب کہ راولپنڈی میں 225 ٹیسٹ کیے گئے جن میں سے تین کیسز کی تصدیق 1.33 فیصد کے تناسب سے ہوئی۔ اسلام آباد میں 333 ٹیسٹوں میں 4.20 فیصد کے تناسب سے 14 کیسز کی تصدیق ہوئی۔
یہ بھی پڑھیں | گھریلو خواتین کے لئے بغیر انویسٹمینٹ کاروبار کرنے کے آئیڈیاز
کوویڈ سے نمٹنے کا انتظام موجود ہے
نیشنل ہیلتھ سروسز، ریگولیشنز اور کوآرڈینیشن کے وزیر عبدالقادر پٹیل نے کہا ہے کہ حکومت نے کوویڈ19 کی کسی بھی ذیلی قسم سے نمٹنے کے لیے ملک میں بارڈر اور ہیلتھ سروسز کے کردار کو مضبوط کیا ہے۔ وزیر نے کہا کہ ملک کے تمام داخلی راستوں پر نگرانی کا نظام موجود ہے۔
انہوں نے مزید کہا کہ تمام ائیرپورٹ پر مسافروں کی ٹیسٹنگ اور اسکریننگ ہوگی۔ انہوں نے کہا کہ صورتحال قابو میں ہے اور عوام سے کہا کہ وہ افواہوں پر دھیان دینے سے گریز کریں۔
