طیب اردگان مزید پانچ سال کے لئے ترکی کے صدر منتخب
ترکیہ کی سپریم الیکشن کونسل اور سرکاری انادولو ایجنسی کے غیر سرکاری اعداد و شمار کے مطابق، ترکیہ کے صدر رجب طیب اردگان نے دوبارہ انتخاب جیت لیا ہے۔ طیب اردگان 14 مئی کو 50 فیصد سے زیادہ ووٹ حاصل کرنے میں ناکام رہے تھے۔
سپریم الیکشن کونسل کے مطابق، تقریباً تمام ووٹوں کی گنتی ہونے کے بعد اردگان نے اتوار کو دوسرے راؤنڈ میں 52.14 فیصد ووٹ حاصل کیے اور اپنے حریف، کمال کلیک دار اوغلو کو شکست دی جنہوں نے 47.86 فیصد ووٹ حاصل کیے۔
آنے والے دنوں میں نتیجہ کی تصدیق متوقع ہے۔
ووٹ نے تاریخ میں طیب اردگان کی مقبولیت پر مہر تصدیق ثبت کر دی ہے کیونکہ انہوں نے اپنی 20 سالہ حکمرانی کو مزید پانچ سال تک بڑھا دیا ہے۔
یہ بھی پڑھیں | پاکستان نے آئی ایم ایف سے معاہدے کے لیے امریکا سے مدد مانگ لی
وہ جمہوریہ ترکی کے بانی مصطفی کمال اتاترک کی 15 سالہ صدارت کو پہلے ہی پیچھے چھوڑ چکے ہیں۔
طیب اردگان نے استنبول کے اسکودر میں اپنی رہائش گاہ کے باہر مداحوں کا شکریہ ادا کیا
اردگان نے کہا کہ ہم نے اپنے عوام کے حق میں صدارتی انتخابات کا دوسرا دور مکمل کر لیا ہے۔ انشاء اللہ ہم آپ کے بھروسے اور امیدوں پر پورا اتریں گے۔
انہوں نے مزید کہا کہ ملک کے تمام 85 ملین شہری 14 مئی اور 28 مئی کو ہونے والی ووٹنگ کے دو راؤنڈز کے "فاتح” ہیں۔
