حکومتِ پنجاب نے ملک بھر کے پیدائشی طور پر دل کے امراض میں مبتلا معصوم بچوں کو مفت اور معیاری علاج فراہم کرنے کے لیے ایک تاریخی فلاحی منصوبہ وزیراعلیٰ پنجاب چلڈرن ہارٹ سرجری پروگرام باضابطہ طور پر شروع کر دیا ہے۔ پنجاب میں بچوں کے دل کی مفت سرجری کے اس پروگرام کا بنیادی مقصد اس بات کو یقینی بنانا ہے کہ پاکستان کے کسی بھی کونے سے تعلق رکھنے والے بچوں کو مالی رکاوٹوں کے بغیر دل کے خصوصی علاج اور سرجری کی جدید ترین سہولیات میسر آ سکیں۔ پنجاب ہیلتھ انیشی ایٹو مینجمنٹ کمپنی (PHIMC) کے مطابق، یہ سہولت پنجاب بھر کے نامزد سرکاری اور نجی ہسپتالوں کے ایک وسیع نیٹ ورک کے ذریعے فراہم کی جا رہی ہے۔
سرکاری ہسپتالوں کی فہرست
پنجاب حکومت کے اس فلاحی پروگرام کے تحت صوبے کے درج ذیل بڑے سرکاری طبی اداروں میں بچوں کے دل کے آپریشن بالکل مفت کیے جا رہے ہیں:
لاہور: چلڈرن ہسپتال لاہور (Children’s Hospital Lahore) اور پنجاب انسٹی ٹیوٹ آف کارڈیالوجی (PIC) لاہور۔
راولپنڈی: راولپنڈی انسٹی ٹیوٹ آف کارڈیالوجی (RIC)۔
ملتان: چلڈرن ہسپتال ملتان (Children’s Hospital Multan)۔
بہاولپور: بہاول وکٹوریہ ہسپتال (BVH) بہاولپور۔
فیصل آباد: فیصل آباد انسٹی ٹیوٹ آف کارڈیالوجی (FIC)۔
14 نجی ہسپتالوں کی شمولیت اور رابطہ ہیلپ لائنز
سرکاری اداروں پر مریضوں کا دباؤ کم کرنے اور علاج تک فوری رسائی کو ممکن بنانے کے لیے پنجاب میں بچوں کے دل کی مفت سرجری کے نیٹ ورک میں اسلام آباد، لاہور، ملتان، راولپنڈی اور فیصل آباد کے 14 نامزد پرائیویٹ ہسپتالوں کو بھی شامل کیا گیا ہے۔
وہ والدین اور سرپرست جو اپنے بچوں کے علاج کے لیے اس پروگرام میں رجسٹریشن کروانا یا مزید معلومات حاصل کرنا چاہتے ہیں وہ درج ذیل سرکاری ہیلپ لائن نمبرز پر رابطہ کر سکتے ہیں:
ٹول فری ہیلپ لائن: 0800-07542
ٹیلی فون نمبرز: 042-99066000 اور 042-99066001
واٹس ایپ : 0333-6756390
ایس ایم ایس کوڈ: 8500
یہ پروگرام پی ایچ آئی ایم سی (PHIMC) اور شریک طبی اداروں کے باہمی اشتراک سے چلایا جا رہا ہے تاکہ ہر مستحق بچے کو نئی زندگی فراہم کی جا سکے۔
