حکومتِ سندھ نے 2022 کے تباہ کن سیلاب سے متاثر ہونے والے خاندانوں کی آباد کاری کے لیے شروع کیے گئے دنیا کے سب سے بڑے ہاؤسنگ پروجیکٹ میں ایک تاریخی کامیابی حاصل کر لی ہے۔ سندھ پیپلز ہاؤسنگ فار فلڈ افیکٹیز (SPHF) کے تحت صوبے بھر میں 10 لاکھ 7 ہزار 111 موسمیاتی مکانات کی تعمیر کامیابی سے مکمل کر لی گئی ہے۔ اس شاندار کامیابی کا جشن منانے کے لیے وزیراعلیٰ ہاؤس کراچی میں ایک خصوصی تقریب منعقد کی گئی جس میں پی پی پی کے چیئرمین بلاول بھٹو زرداری اور وزیراعلیٰ سندھ سید مراد علی شاہ نے شرکت کی۔
سندھ میں سیلاب متاثرین کے مکانات کے لیے ڈیجیٹل مانیٹرنگ اور فنڈز
تقریب سے خطاب کرتے ہوئے وزیراعلیٰ مراد علی شاہ نے بتایا کہ صوبے کے 23 اضلاع میں مجموعی طور پر 21 لاکھ گھر بنانے کا ہدف طے کیا گیا ہے۔ سندھ میں سیلاب متاثرین کے مکانات کی تعمیر کے لیے کسی ٹھیکیدار کے بجائے رقم براہِ راست متاثرہ خاندانوں کے بینک اکاؤنٹس میں منتقل کی گئی تاکہ وہ خود اپنی نگرانی میں مضبوط گھر بنا سکیں۔ شفافیت کو یقینی بنانے کے لیے نادرا اور جیو ٹیگنگ کے ذریعے ہر گھر کی ڈیجیٹل مانیٹرنگ کی گئی ہے۔ اس میگا منصوبے کے لیے عالمی بینک نے 500 ملین ڈالر جبکہ حکومتِ سندھ نے 179 ملین ڈالر کے فنڈز فراہم کیے ہیں۔
1 million homes completed. 1 million more to go! Through the Sindh People’s Housing for Flood Affectees (SPHF) programme, families are rebuilding their lives, one home at a time. This is more than reconstruction; it is a commitment to empowering women and building a stronger, more resilient Sindh.
— PPP (@MediaCellPPP) November 11, 2026
خواتین کو مالکانہ حقوق کی فراہمی اور اگلا فیز
اس ہاؤسنگ پروگرام کی سب سے منفرد خصوصیت یہ ہے کہ تیار ہونے والے مکانات کی ملکیت اور رجسٹری دیہی خواتین کے نام پر کی گئی ہے جس سے لاکھوں خواتین کو معاشی تحفظ اور معاشرتی خودمختاری حاصل ہوئی ہے۔ حکومت اب اس منصوبے کے اگلے فیز کے تحت تقریباً 1 ارب ڈالر کی مشترکہ سرمایہ کاری سے 4,800 دیہاتوں میں پینے کا صاف پانی، سیوریج اور ڈرینج کا جدید ترین بلدیاتی انفراسٹرکچر فراہم کرنے جا رہی ہے تاکہ سیلاب متاثرین کو تمام بنیادی شہری سہولیات ان کی دہلیز پر میسر آ سکیں۔
