پنجاب کے محکمہ ترقی خواتین (Women Development Department) نے پنجاب اسکلز ڈویلپمنٹ فنڈ (PSDF) کے تعاون سے دیہی اور پسماندہ علاقوں کی خواتین کو بااختیار بنانے کے لیے پنجاب شی تھریڈز پروگرام 2026 کے تحت رجسٹریشن کا باضابطہ آغاز کر دیا ہے۔ اس شاندار منصوبے کا بنیادی مقصد خواتین کو ٹیکسٹائل اور گارمنٹس مینوفیکچرنگ کی صنعتوں میں مفت پیشہ ورانہ تربیت فراہم کرنا اور انہیں فوری روزگار کے مواقع مہیا کرنا ہے۔
مفت صنعتی ٹریننگ، وظیفہ اور دیگر مراعات
اس پروگرام کے تحت منتخب ہونے والی خواتین کو ٹیکسٹائل کے شعبے میں تین ماہ کی مفت صنعتی تربیت دی جائے گی۔ دورانِ ٹریننگ تمام طالبات کو حکومت کی جانب سے پندرہ ہزار (15,000) روپے ماہانہ وظیفہ دیا جائے گا جبکہ سفری اخراجات کے لیے ٹرانسپورٹ الاؤنس بھی فراہم کیا جائے گا۔ ٹریننگ کورسز میں انڈسٹریل اسٹچنگ مشین آپریٹر اور اپیرل سپروائزر جیسی جدید مہارتیں شامل ہیں جبکہ کورس مکمل ہونے کے بعد معروف گارمنٹ کمپنیوں میں ملازمتیں بھی فراہم کی جائیں گی۔
پروگرام میں اپلائی کرنے کے لیے سائلین کی عمر 18 سے 45 سال کے درمیان ہونی چاہیے اور کم از کم تعلیمی قابلیت مڈل پاس مقرر کی گئی ہے۔ درخواست گزار کے لیے لازمی ہے کہ وہ ماضی میں اس فیکٹری یا ادارے سے وابستہ نہ رہی ہو جہاں وہ ٹریننگ حاصل کرنا چاہتی ہے۔ امیدوار خواتین کو رجسٹریشن کے لیے اپنے اصل کمپیوٹرائزڈ شناختی کارڈ (CNIC) اور ڈومیسائل سرٹیفکیٹ کے ہمراہ متعلقہ سینٹر کا دورہ کرنا ہوگا۔
لاہور اور فیصل آباد میں آن سائٹ رجسٹریشن کا طریقہ
پنجاب شی تھریڈز پروگرام 2026 کے تحت فارم جمع کرانے کے لیے کسی آن لائن پورٹل کے بجائے براہِ راست ٹیکسٹائل فیکٹریوں میں آن سائٹ رجسٹریشن ڈیسک قائم کیے گئے ہیں۔ فیصل آباد کی خواتین اسٹچنگ کورس کے لیے "مسعود ٹیکسٹائل ملز” (32 کلومیٹر، شیخوپورہ روڈ) پر جا کر اپلائی کر سکتی ہیں جبکہ لاہور کی خواتین سپروائزر کورس کے لیے "شاہ کام انڈسٹریز” (ڈیفنس روڈ، نزد ملتان روڈ) کے رجسٹریشن عملے سے فوری رابطہ کر کے اپنی نشست محفوظ کر سکتی ہیں۔
