وزیر اعلیٰ پنجاب مریم نواز شریف نے کم آمدنی والے خاندانوں کو اپنے مکانات کی مرمت اور توسیع میں مالی معاونت فراہم کرنے کے لیے اپنی چھت محفوظ چھت اسکیم کے پورٹل کا باقاعدہ آغاز کر دیا ہے۔ اس فلیگ شپ پروگرام کا بنیادی مقصد ایسے شہریوں کی مدد کرنا ہے جو اپنے موجودہ گھر پر اضافی کمرہ یا دوسری منزل تعمیر کرنا چاہتے ہیں لیکن مالی وسائل کی کمی کا شکار ہیں۔ اسکیم کے تحت حکومت پنجاب شہریوں کو 10 لاکھ (1 ملین) روپے تک کا 100 فیصد بلاسود قرضہ فراہم کر رہی ہے، جس کی واپسی انتہائی آسان ماہانہ اقساط میں ممکن بنائی گئی ہے۔
اپنی چھت محفوظ چھت اسکیم قرض کی اقسام اور ماہانہ اقساط کا شیڈول
حکومت کی جانب سے اس اسکیم کو دو مختلف کیٹیگریز میں تقسیم کیا گیا ہے تاکہ ضرورت مند خاندان اپنی گنجائش کے مطابق فائدہ اٹھا سکیں۔
پہلی کیٹیگری چھتوں کی مرمت کے لیے قرض کی ہے۔ اگر کسی شہری کے گھر کی چھت خستہ حال یا غیر محفوظ ہے تو وہ چھت کو مضبوط بنانے کے لیے 5 لاکھ روپے تک کا بلاسود قرض لے سکتا ہے۔ اس قرض کی ماہانہ قسط صرف 4,700 روپے مقرر کی گئی ہے۔
دوسری کیٹیگری گھر کی توسیع یا اضافی منزل کی تعمیر کے لیے قرض کی ہے۔ ایسے خاندان جنہیں رہائش کے لیے مزید جگہ درکار ہے وہ گھر میں نیا کمرہ بنانے یا دوسری منزل تعمیر کرنے کے لیے 10 لاکھ روپے کا قرض حاصل کر سکتے ہیں۔ اس بڑے قرض کی ماہانہ قسط صرف 9,300 روپے ہوگی۔
اس اسکیم کی سب سے بہترین خصوصیت یہ ہے کہ یہ قرض 9 سال کی طویل مدت پر محیط ہے اور پہلے 3 ماہ تک کوئی قسط ادا نہیں کرنی ہوگی، جسے گریس پیریڈ کہا جاتا ہے۔ اس کے علاوہ تمام ایڈمنسٹریٹو چارجز اور سود کی رقم حکومت پنجاب خود برداشت کرے گی۔
اپنی چھت محفوظ چھت اسکیم کے لیے اہلیت کا معیار
10 لاکھ روپے کا بلاسود قرضہ حاصل کرنے کے لیے درخواست گزار کا درج ذیل شرائط پر پورا اترنا لازمی ہے:
درخواست گزار پنجاب کا مستقل رہائشی ہو اور اس کے شناختی کارڈ پر پنجاب کا پتہ درج ہو۔
نادرا کے ریکارڈ کے مطابق درخواست گزار اپنے خاندان کا سربراہ ہونا چاہیے۔
شہری علاقوں میں 5 مرلہ یا اس سے کم، اور دیہی علاقوں میں 10 مرلہ یا اس سے کم کا ذاتی گھر یا پلاٹ ہونا ضروری ہے۔
درخواست گزار کا نام نیشنل Sosial اکانومک رجسٹری (NSER) میں شامل ہو اور پی ایم ٹی اسکور حکومت کی مقرر کردہ حد کے اندر ہو۔
درخواست گزار کسی بھی بینک یا مالیاتی ادارے کا ڈیفالٹر نہ ہو اور نہ ہی اس پر کوئی مجرمانہ ریکارڈ ہو۔
اپنی چھت محفوظ چھت اسکیم میں آن لائن اپلائی کرنے کا طریقہ
حکومت نے شہریوں کی سہولت کے لیے درخواست کا عمل مکمل طور پر ڈیجیٹل اور پیپر لیس کر دیا ہے۔ آپ درج ذیل مراحل پر عمل کر کے گھر بیٹھے اپلائی کر سکتے ہیں:
سب سے پہلے اپنے موبائل یا کمپیوٹر سے آفیشل پورٹل acag.punjab.gov.pk پر جائیں۔ وہاں اپنے شناختی کارڈ اور موبائل نمبر کے ذریعے نیا اکاؤنٹ بنائیں۔ اکاؤنٹ لاگ ان کرنے کے بعد اسکرین پر موجود "اپنی چھت محفوظ چھت” کے آپشن کا انتخاب کریں۔
اس کے بعد اپنی ضرورت کے مطابق گھر کی توسیع یعنی 10 لاکھ روپے کی کیٹیگری سلیکٹ کریں۔ اگلے مرحلے میں فارم کے اندر اپنی تمام ذاتی معلومات درست طریقے سے درج کریں اور مکان کے ملکیتی دستاویزات جیسے رجسٹری یا فرد وغیرہ اپ لوڈ کریں۔ آخر میں درخواست فارم کو ایک بار اچھی طرح ریویو کر کے فائنل سبمٹ کر دیں۔
جو لوگ انٹرنیٹ استعمال کرنا نہیں جانتے، وہ اپنے قریبی ڈپٹی کمشنر، اسسٹنٹ کمشنر یا پنجاب ہاؤسنگ اینڈ ٹاؤن پلاننگ ایجنسی کے دفتر جا کر دستی درخواست بھی جمع کروا سکتے ہیں۔ کسی بھی قسم کی رہنمائی کے لیے حکومت کی ٹول فری ہیلپ لائن 0800-09100 پر رابطہ کیا جا سکتا ہے۔
