سینٹرل ایشین والی بال چیمپئن شپ: ناقابلِ شکست پاکستان کی شاندار کارکردگی اور سیمی فائنل میں رسائی

 پاکستان کی قومی والی بال ٹیم نے شاندار کھیل کا مظاہرہ کرتے ہوئے زونگ 5G سینٹرل ایشین والی بال چیمپئن شپ 2026 کے سیمی فائنل کے لیے کوالی فائی کر لیا ہے۔ اسلام آباد کے پاکستان اسپورٹس کمپلیکس میں واقع لیاقت جیمینشیم میں کھیلے گئے آخری لیگ میچ میں میزبان پاکستان نے قازقستان کو اسٹریٹ سیٹس میں شکست دے کر ٹورنامنٹ میں اپنی ناقابلِ شکست مہم کو برقرار رکھا ہے۔ اس فتح کے ساتھ ہی پاکستان نے پانچ میچوں میں مسلسل پانچویں کامیابی حاصل کر کے پوائنٹس ٹیبل پر پہلی پوزیشن حاصل کر لی ہے۔

پاکستان اسپورٹس کمپلیکس میں گرین شرٹس کی فتوحات کا سفر

پاکستان والی بال فیڈریشن (PVF) کے زیر اہتمام منعقدہ اس سات روزہ بین الاقوامی ایونٹ میں چھ ممالک کی ٹیمیں حصہ لے رہی ہیں جن میں پاکستان، قازقستان، ازبکستان، بنگلہ دیش، سری لنکا اور نیپال شامل ہیں۔ پاکستان نے ٹورنامنٹ کے پہلے ہی دن سے جارحانہ انداز اپنایا۔ اپنے پہلے میچ میں سری لنکا کو 3-0 سے ہرا کر شاندار آغاز کرنے والی گرین شرٹس نے اگلے میچوں میں بھی فتوحات کا تسلسل برقرار رکھا۔

قازقستان کے خلاف کھیلے گئے آخری گروپ میچ میں تماشائیوں کی بڑی تعداد ٹیم کی حوصلہ افزائی کے لیے اسٹیڈیم میں موجود تھی۔ پاکستان نے یہ اہم میچ 25-23، 25-19 اور 25-21 کے اسکور سے اپنے نام کیا۔ اس سے قبل پاکستانی ٹیم نے ازبکستان کو بھی اسٹریٹ سیٹس (25-13، 25-22، 25-18) سے چیت کر کے سیمی فائنل میں اپنی جگہ پکی کر لی تھی۔

بہترین دفاع اور مضبوط مڈل بلاکنگ 

قومی ٹیم کے ہیڈ کوچ اور اسپورٹس اینالسٹس کے مطابق، اس پورے ٹورنامنٹ میں پاکستان کی کامیابی کی بنیادی وجہ بہترین ٹیم ورک، مضبوط ڈیفنس، تیز رفتار سروسز اور انتہائی منظم مڈل بلاکنگ رہی ہے۔ قازقستان کے خلاف میچ کے پہلے سیٹ میں مہمان ٹیم نے سخت مقابلہ کیا اور ایک وقت پر برتری بھی حاصل کی لیکن کپتان مراد جہان اور عثمان فریاد علی کی شاندار اسمیشز اور نپی تلی حکمت عملی کی بدولت پاکستان نے اہم پوائنٹس حاصل کر کے میچ پر گرفت مضبوط کر لی۔

پورے ٹورنامنٹ کی خاص بات یہ ہے کہ پاکستان نے گروپ اسٹیج کا کوئی بھی میچ یا سیٹ ڈراپ نہیں کیا اور مجموعی طور پر 15 پوائنٹس کے ساتھ سیمی فائنل مرحلے میں قدم رکھا ہے۔

سیمی فائنل کا لائن اپ اور فائنل

لیگ مرحلے کے اختتام کے بعد سیمی فائنل کا لائن اپ مکمل ہو چکا ہے۔ ٹورنامنٹ کے شیڈول کے مطابق پہلے سیمی فائنل میں نمبر ون پوزیشن پر موجود پاکستان کا مقابلہ چوتھے نمبر پر آنے والی ٹیم سری لنکا سے ہوگا۔ جبکہ دوسرے سیمی فائنل میں بنگلہ دیش اور ازبکستان کی ٹیمیں فائنل کے ٹکٹ کے لیے آمنے سامنے ہوں گی۔

پاکستانی شائقین اور اسپورٹس بورڈ کو قوی امید ہے کہ جس فارم میں اس وقت گرین شرٹس نظر آ رہی ہیں وہ نہ صرف فائنل میں پہنچیں گی بلکہ ہوم گراؤنڈ پر ٹائٹل جیت کر ملک کا نام روشن کریں گی۔