کوئٹہ عدالت کی اشتعال انگیزی کیس میں حسن نیازی کی ضمانت منظور
بلوچستان کی عدالت نے پاکستان تحریک انصاف (پی ٹی آئی) کے چیئرمین عمران خان کے بھانجے اور پی ٹی آئی کے فوکل پرسن حسن خان نیازی کی عوام کو اکسانے کے مقدمے میں ضمانت منظور کر لی ہے۔
جوڈیشل مجسٹریٹ نے 1 لاکھ روپے کے ضمانتی مچلکوں کے عوض ضمانت منظور کی جبکہ حسن خان نیازی کو سخت سیکیورٹی میں ان کے سامنے پیش کیا گیا۔ سماعت کے دوران انصاف لائرز فورم کے اراکین اور صحافی حفیظ اللہ نیازی عدالت میں موجود تھے۔
یہ بھی پڑھیں | پی ٹی آئی سربراہ صرف اسٹیبلشمنٹ سے بات کرنا چاہتے ہیں، خواجہ آصف
جسمانی ریمانڈ کی درخواست مسترد
جج نے پولیس کی جانب سے سیاسی رہنما کے پانچ روزہ جسمانی ریمانڈ کی درخواست مسترد کر دی۔
دریں اثنا، وفاقی دارالحکومت کی ایک ڈسٹرکٹ اینڈ سیشن عدالت نے بھی مسٹر نیازی کی 30 ہزار روپے کے ضمانتی مچلکوں کے عوض ضمانت منظور کر لی ہے۔ ڈیوٹی جج احتشام عالم خان نے درخواست پر فیصلہ سنایا۔
کوئٹہ پولیس نے حسن نیازی کو ایک روز قبل اسلام آباد پولیس سے حراست میں لیا تھا جب ان کے خلاف ائیرپورٹ تھانے میں مبینہ طور پر شہر میں لوگوں کو احتجاج پر اکسانے کے الزام میں مقدمہ درج کیا گیا تھا۔
پولیس نے کہا کہ اس ماہ کے شروع میں پی ٹی آئی کے متعدد کارکنوں کو احتجاج پر گرفتار کیا گیا ہے۔ انہوں نے مزید کہا کہ حراست میں لیے گئے ملزمان نے تفتیش کے دوران حسن نیازی کا نام لیا تھا۔
یاد رہے کہ ایک روز قبل ضلعی عدالت نے پی ٹی آئی رہنما کا ایک روزہ راہداری ریمانڈ کوئٹہ پولیس کے حوالے کیا تھا۔ پولیس نے ٹرانزٹ ریمانڈ کی استدعا کی تھی کہ اسے کوئٹہ کے جوڈیشل مجسٹریٹ کے سامنے پیش کیا جائے جسے عدالت نے منظور کرلیا۔
