کویت نے ایک بار پھر پاکستانی شہریوں پر عائد ویزا پابندی کو ختم کر دیا ہے اور مختلف اقسام کے ویزے جاری کرنا شروع کر دیے ہیں۔ ان میں ورک ویزا، فیملی وزٹ، ڈیپینڈنٹ، سیاحتی اور کاروباری ویزے شامل ہیں۔
پاکستان کے کویت میں سفیر ڈاکٹر ظفر اقبال نے تصدیق کی ہے کہ مئی سے پاکستانیوں کے لیے ویزا خدمات دوبارہ شروع کر دی گئی ہیں۔ بہت سے پاکستانی درخواست گزاروں کو ویزوں کی منظوری بھی ملنا شروع ہو گئی ہے۔ اس اقدام کو دونوں ممالک کے درمیان دوستی کے رشتے کو مضبوط بنانے کی اہم پیش رفت قرار دیا جا رہا ہے۔
Kuwait has lifted 19-year visa ban on Pakistani citizens, resuming the issuance of work, family, visit, tourist, and business visas, a major diplomatic achievement and a step towards deeper bilateral cooperation.
— PMLN Punjab (@PMLNPunjabPk) May 27, 2025
🇵🇰🤝🇰🇼 pic.twitter.com/r8L8p7GXq5
ویزا پابندی کے خاتمے کے بعد ایک بڑا قدم یہ ہے کہ کویت نے 1,200 پاکستانی نرسز کو بھرتی کرنے کا منصوبہ بنایا ہے۔ ان میں سے پہلے 125 نرسز کا گروپ حال ہی میں کویت پہنچنا تھا لیکن رہائش کے مسائل کی وجہ سے ان کی آمد میں تاخیر ہوئی ہے۔ ڈاکٹر ظفر اقبال نے بتایا ہے کہ ان مسائل کو حل کرنے کے لیے خصوصی ٹیمیں کام کر رہی ہیں اور جلد ہی نرسز کویت پہنچ جائیں گی۔
ڈاکٹر ظفر اقبال نے مزید بتایا ہے کہ پاکستان اور کویت ایک لیبر معاہدے (ایم او یو) کو حتمی شکل دینے کے قریب ہیں۔ اگرچہ یہ معاہدہ ابھی باضابطہ طور پر دستخط نہیں ہوا لیکن اس کے کچھ نکات پر عملدرآمد پہلے ہی شروع ہو چکا ہے تاکہ بھرتی کے عمل کو آسان بنایا جا سکے۔
انہوں نے کہا ہے کہ پاکستانی شہری کویتی معاشرے میں عزت کی نگاہ سے دیکھے جاتے ہیں اور اہم کردار ادا کر رہے ہیں۔ ان کا مزید کہنا تھا کہ اس وقت کویت میں 93,000 سے زائد پاکستانی مقیم ہیں جو صحت، تعلیم اور دیگر شعبوں میں خدمات سرانجام دے رہے ہیں۔
یہ بھی پڑھیں : پاکستانی متحدہ عرب امارات میں ملازمت کو کیوں ترجیح دیتے ہیں؟
