کراچی: درجہ حرارت بڑھنے کی پیشنگوئی، مون سون بارشیں کب ہوں گی؟

پاکستان محکمہ موسمیات (پی ایم ڈی) نے کئی دنوں کے ابر آلود موسم کے بعد آج (پیر) سے کراچی میں درجہ حرارت میں اضافے کی پیش گوئی کی ہے۔ 

پی ایم ڈی کے مطابق، شہر کراچی میں گرمی کی شدت میں اضافے کا امکان ہے۔ سمندری ہوائیں بند ہونے کے بعد اگلے 24 گھنٹوں تک گرم اور مرطوب حالات رہیں گے اور شمال مغرب سے ہوائیں 18 کلومیٹر فی گھنٹہ کی رفتار سے چل رہی ہیں۔ 

ریکارڈ کیا گیا کم سے کم درجہ حرارت 30.4 تھا اور زیادہ سے زیادہ 35 اور 37  کے درمیان پہنچنے کا امکان ہے جبکہ نمی کی سطح 73 فیصد ہے۔ 

پی ایم ڈی نے شام یا رات کے وقت بوندا باندی یا ہلکی بارش کے امکان کا بھی ذکر کیا جس سے گرمی سے کچھ راحت ملے گی۔ 

درجہ حرارت میں متوقع اضافے کے باوجود، پی ایم ڈی نے ایک اور ہیٹ ویو کے امکان کو مسترد کر دیا۔ 

یاد رہے کہ پی ایم ڈی کی جانب سے 18 یا 19 جولائی سے کراچی سمیت سندھ میں مون سون بارشوں کی بھی پیش گوئی کی گئی ہے۔