پاکستان نے عالمی چیمپئن شپ آف لیجنڈز میں دوسری جیت اپنے نام کر لی

برمنگھم کے ایجبسٹن کرکٹ گراؤنڈ میں پاکستان نے ویسٹ انڈیز کو 29 رنز سے شکست دے کر جاری عالمی چیمپئن شپ آف لیجنڈز میں  دوسری جیت اپنے نام کر لی ہے۔

تفصیلات کے مطابق پاکستانی ٹیم نے 195 رنز کا ہدف دینے کے بعد ویسٹ انڈیز کو 165/9 تک آؤٹ کر دیا۔ اسی طرح پاکستان نے اپنے پہلے میچ میں آسٹریلیا کو پانچ وکٹوں سے شکست دی تھی۔

 میچ کا احوال

 یونس خان نے پہلے بیٹنگ کا فیصلہ کیا۔ کامران اکمل نے 7 گیندوں پر صرف 5 رنز بنائے۔ شرجیل خان نے 15 گیندوں پر 35 رنز بنائے۔ صہیب مقصود نے 12 گیندوں پر 22 رنز بنائے لیکن یہ شعیب ملک تھے جنہوں نے 41 گیندوں پر پانچ چوکوں اور ایک چھکے کی مدد سے 54 رنز بنا کر پاکستان کی جیت کی راہ ہموار کی۔ شاہد آفریدی نے 10 گیندوں پر 16 جبکہ عامر یامین نے بیک اینڈ پر صرف 11 گیندوں میں 29 رنز بنائے اور پاکستان نے 194/8 کا اسکور کیا۔ 

رنز کے تعاقب میں ویسٹ انڈیز کے صرف دو بلے بازوں نے اہم کردار ادا کیا۔ اوپنر ڈوین اسمتھ نے 46 گیندوں پر 65 اور جوناتھن کارٹر نے 25 گیندوں پر 34 رنز بنائے۔ پاکستانی باؤلرز نے وقفے وقفے سے وکٹیں لے کر دباؤ جاری رکھا۔