پاکستان نے اپنے پہلے قمری مشن کے آغاز کا اعلان کر دیا ہے، جو 2028 میں لانچ کیا جائے گا۔ یہ اعلان اسپیس اینڈ اپر ایٹموسفیئر ریسرچ کمیشن (SUPARCO) کی جانب سے کیا گیا، جس کے مطابق پاکستان کا چاند گاڑی مشن چین کے چانگ ای 8 مشن کا حصہ ہوگا۔
چانگ ای 8 مشن، جو 2028 میں روانہ کیا جائے گا، چاند کے جنوبی قطب پر روبوٹک تحقیق پر مرکوز ہوگا۔ اس مشن میں پاکستان کی چاند گاڑی بھی شامل ہوگی، جو سائنسی تحقیق کے لیے جدید آلات سے لیس ہوگی۔
سپارکو نے عوام کو اس تاریخی منصوبے میں شامل کرنے کے لیے چاند گاڑی کے نام کے انتخاب کے لیے ایک قومی مقابلے کا آغاز کیا ہے۔ جیتنے والے کو ایک لاکھ روپے کا انعام دیا جائے گا۔
پاکستان کی چاند گاڑی، جو سپارکو کے ماہرین نے تیار کی ہے، چاند کے جنوبی قطب پر اتاری جائے گی۔ اس میں پاکستانی سائنسدانوں کے تیار کردہ سائنسی آلات موجود ہوں گے، جبکہ کچھ آلات چین اور یورپ کے اشتراک سے بھی بنائے گئے ہیں۔
اس سے قبل، مئی 2022 میں، پاکستان نے اپنا پہلا قمری سیٹلائٹ چین کے چانگ ای 6 مشن کے ذریعے خلا میں بھیجا تھا، جس نے چاند کے ساؤتھ پول-ایٹکن بیسن سے نمونے اکٹھے کرکے زمین پر واپس بھیجے تھے۔
پاکستان اور چین کے درمیان خلا میں مشترکہ تعاون دونوں ممالک کے سائنسی اور تکنیکی تعلقات کو مزید مضبوط کرنے کی جانب ایک اور بڑا قدم ہے۔
