کراچی ٹریفک پولیس نے نئے سال کی آمد پر عوام کی سہولت کے لیے تفصیلی ٹریفک پلان جاری کیا ہے۔ سی ویو اور دیگر تفریحی مقامات جیسے کلفٹن اور باغ ابنِ قاسم پر لوگوں کے متوقع ہجوم کے پیش نظر 31 دسمبر 2024 سے یکم جنوری 2025 کے دوران کئی اہم سڑکیں بند رہیں گی۔
نیو ائیر نائٹ 2025 پر ٹریفک صورتحال
ٹریفک پلان کے تحت سیکیورٹی سخت کی گئی ہے، جبکہ شہر میں دو دن کے لیے دفعہ 144 نافذ کر دی گئی ہے۔ اس قانون کے تحت اسلحے کی نمائش، ہوائی فائرنگ، اور پٹاخے چلانے پر پابندی ہوگی۔ تاہم، ماضی میں جشن کے دوران ہوائی فائرنگ کے باعث کئی لوگ زخمی یا جاں بحق ہو چکے ہیں، جسے روکنے کے لیے اس سال مزید سخت اقدامات کیے گئے ہیں۔
ڈی ایچ اے کے رہائشیوں کے لیے ہدایات
ڈیفنس ہاؤسنگ اتھارٹی (DHA) کے رہائشیوں کو متبادل راستے استعمال کرنے کی ہدایت کی گئی ہے تاکہ ٹریفک کی روانی متاثر نہ ہو۔ رہائشی اپنے اصل شناختی کارڈ دکھا کر آسانی سے سفر کر سکتے ہیں۔
نیو ائیر 2025 پر بند سڑکیں
1. پی آئی ڈی سی چوک (ضیاء الدین روڈ) سے ضیاء الدین برج کی جانب لکی سگنل تک
2. پی آئی ڈی سی چوک سے کلب روڈ
3. بلاول چورنگی سے بحریہ انڈر پاس
4. دو تلوار سے عبداللہ شاہ غازی مزار تک
5. عبداللہ شاہ غازی مزار سے 26 اسٹریٹ
نیو ائیر 2025 پر متبادل راستے
کورنگی، سن سیٹ بلیوارڈ، اور گزری کے رہائشیوں کے لیے:
• کورنگی روڈ، سن سیٹ بلیوارڈ، گزری برج، سعودی سگنل سے خیابانِ شمشیر اور سی ویو روڈ (میکڈونلڈز) کی جانب۔
نارتھ ناظم آباد، گلبرگ، لیاقت آباد کے رہائشیوں کے لیے:
• ایم اے جناح روڈ، گارڈن روڈ، زیب النساء اسٹریٹ، آواری سگنل، سندھ کلب چوک، تین تلوار، زم زم بلیوارڈ، اور سی ویو روڈ۔
گڈاپ، بن قاسم، لانڈھی، شاہ فیصل کے رہائشیوں کے لیے:
• شارع فیصل، سندھ کلب چوک، تین تلوار، ریس کورس سگنل، چوہدری خالد الزمان روڈ، گزری برج، سعودی سگنل سے خیابانِ شمشیر اور سی ویو روڈ۔
مائی کولاچی اور بوٹ بیسن کے مسافرین کے لیے:
• جناح برج، بلاول ہاؤس چورنگی، میرین روڈ (ہائپر اسٹار) سے سی ویو روڈ۔
بھاری گاڑیوں کے لیے بندش
ماڑی پور روڈ کو بھاری گاڑیوں جیسے ٹینکرز اور ٹرکوں کے لیے مکمل طور پر بند کیا جائے گا۔ انہیں حب ریور روڈ اور شارع پاکستان کی طرف موڑ دیا جائے گا۔
پارکنگ پر پابندی
شہر کی اہم سڑکوں جیسے شارع فیصل، عبداللہ ہارون روڈ، ڈاکٹر ضیاء الدین احمد روڈ، مائی کولاچی روڈ، کورنگی روڈ، اور ایم ٹی خان روڈ پر گاڑیوں کی پارکنگ پر مکمل پابندی ہوگی۔
قوانین کی خلاف ورزی پر سخت کارروائی
ٹریفک پولیس نئے سال کی تقریبات کے دوران بغیر سائلنسر موٹر سائیکلوں اور لاپرواہ ڈرائیونگ کرنے والے ڈرائیورز کے خلاف سخت کارروائی کرے گی۔
عوام کی حفاظت اولین ترجیح
یہ اقدامات نئے سال کی خوشیوں کو محفوظ بنانے اور ٹریفک کی روانی کو یقینی بنانے کے لیے کیے جا رہے ہیں۔ عوام سے اپیل ہے کہ ٹریفک قوانین کی پابندی کریں اور حکومتی ہدایات پر عمل کرتے ہوئے ایک خوشگوار اور محفوظ نئے سال کا استقبال کریں۔
