پاکستانی اداکارہ نادیہ خان نے سینئر اداکار بہروز سبزواری کو سخت تنقید کا نشانہ بناتے ہوئے کہا ہے کہ بہروز سبزواری کی خواتین کے کپڑوں پر بڑی نظر ہوتی ہے کہ وہ چست ہیں یا ڈھیلے۔
بہروز سبزواری نے کچھ عرصہ قبل نادیہ خان کو عجیب خاتون کہہ کر تنقید کا نشانہ بنایا تھا۔ نادیہ خان، مرینہ خان اور روبینہ اشرف کے ہمراہ ایک نجی چینل کے شو میں ٹی وی ڈراموں کا تنقیدی جائزہ لیتے ہوئے اپنے خیالات کا اظہار کرتی ہیں۔
بہروز سبزواری نے نادیہ خان پر تنقید کرتے ہوئے کہا تھا کہ ‘اس شو میں ایک عجیب خاتون ہیں، نادیہ خان، جو نامور مارننگ شو اینکر تھیں، وہ اپنے مارننگ شو میں بھی مہمانوں کی بے عزتی کرتی تھیں’۔
نادیہ خان نے بہروز سبزواری کے ان بیانات پر جواب دیتے ہوئے ان پر سخت تنقید کی ہے۔ اس حوالے سے نادیہ خان کا نجی میڈیا شو سے لیا گیا ایک ویڈیو کلپ وائرل ہو رہا ہے۔
اس ویڈیو کلپ میں نادیہ خان کا کہنا تھا کہ ‘مجھے بہروز سبزواری کے عورتوں پر بات کرنے سے مسئلہ ہے۔ حال ہی میں ایک پوڈکاسٹ کے دوران انہوں نے اپنی سابقہ بہو کے بارے میں بات کی جو کہ لوگوں کو پسند نہیں آئی’۔
انہوں نے مزید کہا کہ ‘بہروز سبزواری کبھی میرے تو کبھی کسی اور عورت کی بات کرتے ہیں، خاص طور پر عورتوں کے کپڑوں کے بارے میں۔ ان کی نظر خواتین کے کپڑوں پر ہوتی ہے کہ وہ چست ہیں یا ڈھیلے، اس پر مجھے بڑی آگ لگتی ہے۔ انہیں مشہور ہونے کا کوئی اور طریقہ سمجھ نہیں آتا تو انہوں نے پوڈکاسٹ میں ایسی بات کی جس سے انہیں لوگوں کی توجہ حاصل ہو گئی’۔
نادیہ خان نے مزید کہا کہ بہروز سبزواری کو دوسروں سے خاص طور پر عورتوں سے متعلق کوئی بھی بات دیکھ کر کرنی چاہیے کیونکہ یہ انہیں مہنگا پڑسکتا ہے۔
