یومِ تشکر آج (جمعہ) کے دن پاکستان بھر میں منایا گیا ہے تاکہ آپریشن بنیانُ المرصوص اور معرکۂ حق میں بھارتی جارحیت کے خلاف کامیابی پر مسلح افواج اور عوام کو خراجِ تحسین پیش کیا جا سکے۔
دن کا آغاز ملک بھر کی مساجد میں خصوصی دعاؤں اور تلاوتِ قرآن پاک سے کیا گیا ہے جس میں ملکی سلامتی اور شکرانے کے جذبات کا اظہار کیا گیاہے۔
وفاقی دارالحکومت اسلام آباد میں فجر کی نماز کے بعد 31 توپوں کی سلامی دی گئی جبکہ تمام صوبائی دارالحکومتوں میں 21 توپوں کی سلامی دی گئی۔ کراچی میں قائداعظم محمد علی جناح کے مزار اور لاہور میں شاعرِ مشرق علامہ اقبال کے مزار پر گارڈز کی تبدیلی کی تقاریب منعقد ہوئیں جو قومی فخر اور شہداء کی یاد تازہ کرنے کی علامت تھیں۔
آپریشن بنیانُ المرصوص کے شہداء کے اہل خانہ سے خصوصی ملاقاتیں بھی کی گئیں جن میں ان کی قربانیوں کو سراہا گیا اور قومی سطح پر ان کے جذبے کا اعتراف کیا گیاہے۔
یومِ تشکر کی مرکزی تقریب اسلام آباد کے پاکستان مونومنٹ پر منعقد ہوئی جس میں وزیرِاعظم محمد شہباز شریف نے بطور مہمانِ خصوصی شرکت کی۔ ان کے ہمراہ چیئرمین جوائنٹ چیفس آف اسٹاف کمیٹی اور آرمی چیف بھی موجود تھے جس سے اس دن کی اہمیت واضح ہوتی ہے۔
اسی دوران نائب وزیرِاعظم اور وزیرِ خارجہ اسحاق ڈار نے سینیٹ میں بتایا کہ پاکستان اور بھارت کے درمیان جنگ بندی کی مدت اب 18 مئی تک بڑھا دی گئی ہے۔ یہ فیصلہ دونوں ممالک کے ڈی جی ایم اوز (ڈائریکٹر جنرل ملٹری آپریشنز) کے درمیان ہاٹ لائن رابطوں کے ذریعے ہوا۔ پہلے مرحلے میں 10 مئی کو جنگ بندی 12 مئی تک طے ہوئی پھر 14 مئی تک بڑھائی گئی اور اب تازہ ترین رابطے میں اسے 18 مئی تک توسیع دے دی گئی ہے۔
یہ بھی پڑھیں : پاکستان کا بھارتی وزیر دفاع کے ایٹمی ہتھیاروں سے متعلق بیان پر سخت ردعمل
