نویں اور دسویں محرم الحرام کے دوران خیبرپختونخوا (کے پی) کے کئی علاقوں میں موبائل فون سروس معطل رہے گی۔
تفصیلات کے مطابق پولیس حکام کا کہنا ہے کہ وزارت داخلہ کو خط ارسال کیا گیا ہے جس میں 9 اور 10 محرم کو موبائل فون سروس بند کرنے کی درخواست کی گئی ہے۔
اہلکار کا مزید کہنا تھا کہ محرم کے دوران صوبے بھر میں فول پروف سیکیورٹی کو یقینی بنانے کے لیے اقدامات کیے گئے ہیں۔
اس سے قبل وفاقی حکومت نے محرم کے مہینے میں سیکیورٹی کو یقینی بنانے کے لیے ملک بھر میں مسلح افواج کی تعیناتی کی منظوری دی تھی۔
یہ اقدام سندھ، بلوچستان، خیبرپختونخوا، اسلام آباد، گلگت بلتستان اور آزاد جموں و کشمیر میں حکام کی جانب سے امن و امان کی صورتحال کو کنٹرول کرنے کے لیے فوج کو تعینات کرنے کی درخواست پر کیا گیا ہے۔
مرکز نے آئین کے آرٹیکل 245 کے تحت امن کو یقینی بنانے کے لیے فوجی دستوں/اثاثوں اور سول مسلح افواج کے دستوں/اثاثوں کی تعیناتی کا اختیار دیا ہے۔
واضح رہے کہ پاکستان میں یوم عاشور 17 جولائی (بدھ) کو منایا جائے گا۔
صوبائی حکومت نے محرم کے 10 دنوں کے دوران سندھ میں ڈبل سواری پر پابندی عائد کر دی ہے۔
عاشورہ اسلامی سال کے پہلے مہینے محرم کی 10 تاریخ کو منایا جاتا ہے جو کہ کربلا کی جنگ میں امام حسین رضی اللہ عنہ اور ان کے ساتھیوں کی عظیم شہادت کا دن ہے۔
