تحریک انصاف (پی ٹی آئی) کے احتجاج کے دوران راولپنڈی اور اسلام آباد میں شدید کشیدگی دیکھنے میں آئی ہے۔ احتجاج سے قبل ہی پولیس اور انتظامیہ نے شہر کے اہم راستوں پر کنٹینرز لگا کر انہیں بند کر دیا ہے تاکہ کارکنوں کو لیاقت باغ پہنچنے سے روکا جا سکے۔ شہر بھر میں پولیس اور رینجرز کے اہلکار تعینات کیے گئے ہیں جبکہ متعدد اہم شاہراہیں، بشمول مری روڈ، کمیٹی چوک اور دیگر مقامات، مکمل طور پر بند کر دی گئی ہیں۔
احتجاجی کارکنان نے مختلف مقامات پر کنٹینرز ہٹا کر آگے بڑھنے کی کوشش کی ہے جس کے نتیجے میں پولیس اور مظاہرین کے درمیان جھڑپیں ہوئی ہیں۔ پولیس نے آنسو گیس کا استعمال کیا ہے جس کے باعث کئی شہری، بشمول خواتین اور بچے، متاثر ہوئے ہیں۔ متعدد علاقوں میں گیس کے اثرات سے میڈیا کارکنان بھی متاثر ہوئے ہیں بعض مقامات پر مظاہرین نے پتھراؤ کے ذریعے پولیس کو پیچھے ہٹنے پر مجبور کر دیا ہے۔
راولپنڈی میں صورتحال کشیدہ ہے اور علاقہ میدان جنگ کا منظر پیش کر رہا ہے۔ پولیس نے مزید نفری اور آنسو گیس کی شیلنگ کے لیے مدد طلب کر لی ہے جبکہ شہر بھر میں ٹریفک کی روانی شدید متاثر ہو رہی ہے۔
