اسرائیل میں لاکھوں افراد کا ملک گیر مظاہرہ، وزیراعظم سے مستعفی ہونے کا مطالبہ

اسرائیل میں نیتن یاہو حکومت کے خلاف لاکھوں اسرائیلیوں کی جانب سے ملک گیر احتجاجی مظاہرے کیے گئے۔

مظاہرین نے غزہ میں موجود قیدیوں کی رہائی کے لیے حماس کے ساتھ سمجھوتہ کرنے، اسرائیل میں نئے انتخابات کے انعقاد اور نیتن یاہو سے استعفیٰ دینے کا مطالبہ کیا۔

تل ابیب میں سیکڑوں افراد نے آگ لگا کر کئی شاہراہیں بند کر دیں، اسرائیلی پولیس اور مظاہرین کے درمیان جھڑپیں بھی ہوئیں اور متعدد مظاہرین کو حراست میں لے لیا گیا۔

دوسری جانب یروشلم اور قیصریہ میں ہزاروں مظاہرین نے وزیراعظم نیتن یاہو کی رہائش گاہوں کے باہر احتجاج کیا، مظاہرین نے غزہ جنگ اور حزب اللہ کے ساتھ تنازع سے نمٹنے میں ناکامی پر حکومت پر سخت نکتہ چینی کی۔

خیال رہے کہ اسرائیل میں اس قسم کے احتجاجی مظاہرے معمول بن چکے ہیں جو کہ عوام اور حکومت کے درمیان دوری کو ظاہر کرتے ہیں۔