پاکستان کے معروف ایتھلیٹ اور اولمپک چیمپئن ارشد ندیم دنیا کے پانچ بہترین نیزہ بازوں میں شامل ہو گئے ہیں۔ ورلڈ ایتھلیٹکس فیڈریشن کی جانب سے جاری کردہ تازہ ترین رینکنگ کے مطابق ارشد ندیم 1370 پوائنٹس کے ساتھ چوتھے نمبر پر موجود ہیں۔
ارشد ندیم نے پیرس اولمپکس میں 92.97 میٹر کی تاریخی تھرو کے ساتھ گولڈ میڈل جیت کر دنیا بھر میں شہرت حاصل کی۔ اس کے بعد انہوں نے ایشین ایتھلیٹکس چیمپئن شپ میں بھی شاندار کارکردگی کا مظاہرہ کرتے ہوئے 86.40 میٹر کی تھرو سے سونے کا تمغہ اپنے نام کیا۔
اگرچہ وہ کچھ اہم بین الاقوامی مقابلوں میں شرکت نہیں کر سکے جس کے باعث ان کی عالمی رینکنگ متاثر ہوئی لیکن اب وہ بھرپور انداز میں اگلے بڑے مقابلے کی تیاری کر رہے ہیں۔
ارشد ندیم ستمبر میں ہونے والی ورلڈ ایتھلیٹکس چیمپئن شپ میں ایک بار پھر ٹاپ پوزیشن حاصل کرنے کے لیے پریکٹس کر رہے ہیں اور یہ ایونٹ ان کے لیے عالمی رینکنگ کو مزید بہتر بنانے کا ایک اہم موقع ثابت ہو سکتا ہے۔
مردوں کی نیزہ بازی کی رینکنگ میں پہلے نمبر پر بھارت کے نیرج چوپڑا 1445 پوائنٹس کے ساتھ موجود ہیں۔ دوسرے نمبر پر گریناڈا کے اینڈرسن پیٹرز 1431 پوائنٹس کے ساتھ، جبکہ تیسرے نمبر پر جرمنی کے جولیان ویبر 1407 پوائنٹس کے ساتھ ہیں۔ ارشد ندیم چوتھے نمبر پر ہیں۔ چیک ریپبلک کے جکب وادیلیچ پانچویں نمبر پر اور کینیا کے جولیئس ییگو چھٹے نمبر پر ہیں۔
خواتین کی نیزہ بازی کی رینکنگ میں جاپان کی ہاروکا کیتاگچی 1405 پوائنٹس کے ساتھ پہلے نمبر پر ہیں۔ دوسرے نمبر پر سربیا کی اڈریانا ویلاگوس، تیسرے نمبر پر جنوبی افریقہ کی جو این ڈو پلیسس اور چوتھے نمبر پر یونان کی الینا تزینگو ہیں۔
یہ بھی پڑھیں : ارشد ندیم نے ایشین ایتھلیٹکس چیمپئن شپ میں گولڈ میڈل جیت لیا
