اپریل 15 2020: (جنرل رپورٹر) کرونا وائرس کی بڑھتی ہوئی تباہ کاریوں نے پچھلے چوبیس گھنٹوں میں مزید 11  افراد کی جان لے لی- تازہ ترین اطلاعات کے مطابق پچھلے چوبیس گھنٹوں میں 3280 ٹیسٹ کئے گئے جن میں سے 272 کنفرم کیسز نکلے جبکہ اسی دوران  11 افراد زندگی کی بازی سے ہاتھ دھو بیٹھے- 

یاد رہے کہ پاکستان میں اب تک کرونا وائرس کے تقریبا  73،439 ٹیسٹ ہوئے جس میں سے  5،988 کرونا کے مریض (کنفرم کیسز) نکلے ہیں- گورنمنٹ آف پاکستان کی کرونا وائرس آگاہی کے متعلق ویب سائٹ پر دئیے گئے اعداد و شمار کے مطابق کرونا وائرس سے اب تک  107 اموات ہو چکی ہیں جبکہ چھیالیس کی حالت خطرے میں ہے- مزید برآں یہ کہ اب تک 1،446 افراد صحتیاب ہو چکے ہیں جو کہ خوش آئیند بات ہے-

اگر ہم صوبہ کے لحاظ سے جائزہ لیں تو گورنمنٹ آف پاکستان کے سرکاری اعداد و شمار کے مطابق پنجاب میں  2،946 کیسز ہیں جبکہ سندھ میں 1،518, خیبرپختونخواہ میں 865, آزاد جموں کشمیر میں 46, گلگت بلستان میں  234 اور وفاق میں 240کیسز ہیں-

دیکھا جائے تو دیگر ممالک کی طرح پاکستان میں بھی کرونا کی صورتحال بگڑتی دکھائی دے رہی ہے- ایک طرف کرونا کا خوف تو دوسری جانب ترقی پذیر ملک ہونے کے ناطے بھوک اور غربت بھی اہم.مسئلہ کے طور پر ایک بار اجاگر ہونے لگی ہے-تاہم تجزیہ نگار اس بات پر بھی متفق ہیں کہ کرونا وائرس نے ایشیاء کے ممالک کو کم متاثر کیا ہے بنسبت یورپ کے- 

یاد رہے کہ یہ تمام معلومات گورنمنٹ آف پاکستان کی کرونا وائرس سے آگاہی مہم کی ویب سائٹ سے لی گئی ہے-