ملتان سے سکھر موٹروے: بس اور آئل ٹینکر کا خوفناک تصادم، بیس افراد جاں بحق 

مسافر بس آئل ٹینکر ٹکرا گئی

آج بروز منگل ملتان سکھر موٹروے (ایم-5) پر کراچی جانے والی مسافر بس آئل ٹینکر ٹکرا گئی ہے جس کے نتیجے میں کم از کم 20 افراد جاں بحق اور 6 زخمی ہوگئے ہیں۔

 موٹروے حکام کا کہنا ہے کہ حادثہ تیز رفتاری کے باعث پیش آیا۔ 

موٹروے حکام کے مطابق حادثہ اس وقت پیش آیا جب تیز رفتار سلیپر بس بے قابو ہو کر ہائی وے پر آئل ٹینکر سے ٹکرا گئی۔ ایم فائیو موٹروے پر جائے حادثہ پر کئی گھنٹوں تک ٹریفک معطل رہی۔

موٹروے پولیس

ترجمان موٹروے پولیس کے مطابق آئل ٹینکر اور بس میں تصادم کے فوری بعد آگ لگ گئی۔ 

حادثے کی اطلاع ملتے ہی موٹروے پولیس کے اہلکار موقع پر پہنچ گئے۔ مقامی پولیس اور ریسکیو 1122 کی ٹیمیں بھی موقع پر پہنچ گئیں۔ 

ترجمان کے مطابق آگ اتنی شدید اور خوفناک تھی کہ دور سے دکھائی دے رہی تھی۔ 

یہ بھی پڑھیں | کراچی: بارشوں کی پیشنگوئی؛ انٹرنیڈیٹ امتحانات کو ملتوی کر دیا گیا

یہ بھی پڑھیں | سوات مکمل طور پر سول انتظامیہ کے پاس ہے، خیبر پختونخواہ پولیس

مسافروں کو ہسپتالوں میں منتقل کر دیا

 زیادہ تر مسافروں کو جلتی ہوئی گاڑیوں سے زندہ بچا لیا گیا اور انہیں فوری طور پر قریبی ہسپتالوں میں منتقل کر دیا گیا۔ جلتی ہوئی بس سے کم از کم نو مسافروں کو بحفاظت نکال لیا گیا۔ 

پولیس ترجمان کا مزید کہنا تھا کہ امدادی ٹیموں کو آگ بجھانے میں کئی گھنٹے لگے۔ 

ایمرجنسی کرائسز سنٹر

 آئی جی خالد محمود کی ہدایت پر موٹروے پولیس نے ایمرجنسی کرائسز سنٹر قائم کر دیا۔ 

بدقسمت سلیپر بس رات 9 بجے لاہور سے کراچی کے لیے روانہ ہوئی۔

بس کمپنی ذرائع کے مطابق بس میں دو ڈرائیور سوار تھے۔ سکھر میں تمام سٹاف کو تبدیل کیا جانا تھا۔ بس میں 24 مسافر سوار تھے جن میں سے دو مسافر حیدرآباد جا رہے تھے جبکہ 22 دیگر کراچی جا رہے تھے۔