پاکستان کے سابق کپتان محمد یوسف نے حال ہی میں پاکستان کرکٹ بورڈ کی سلیکشن کمیٹی سے استعفیٰ دے دیا ہے۔ انہوں نے اس فیصلے کی وجہ ذاتی وجوہات بتائیں، اور سوشل میڈیا پلیٹ فارم ایکس(سابقہ ٹوئٹر) پر ایک پیغام کے ذریعے اپنے استعفے کا اعلان کیا۔
محمد یوسف کا کہنا تھا کہ پاکستان کرکٹ ٹیم کی خدمت کرنا ان کے لیے ایک بڑا اعزاز تھا، اور وہ اس بات پر فخر محسوس کرتے ہیں کہ انہوں نے ٹیم کی کامیابی اور ترقی میں کردار ادا کیا۔
محمد یوسف نے ٹیم کی صلاحیتوں پر اعتماد کا اظہار کرتے ہوئے ٹیم کو مستقبل کے لیے نیک خواہشات پیش کیں۔ تاہم، اندرونی ذرائع کے مطابق، یوسف نے مسلسل میڈیا اور سوشل میڈیا پر تنقید کی وجہ سے یہ قدم اٹھایا۔ وہ اس صورتحال سے ناخوش تھے اور اب اپنی تمام تر توجہ کوچنگ پر مرکوز کرنے کا ارادہ رکھتے ہیں۔
پی سی بی نے ان کے استعفے کی تصدیق کرتے ہوئے کہا کہ وہ اب بھی ہائی پرفارمنس سینٹر میں بطور بیٹنگ کوچ اپنی خدمات جاری رکھیں گے۔ یاد رہے کہ یوسف کو مارچ 2024 میں سلیکشن کمیٹی کا حصہ بنایا گیا تھا، اور وہ پاکستان انڈر-19 ٹیم کے ہیڈ کوچ کے طور پر بھی کام کر چکے ہیں۔
یہ استعفیٰ ایسے وقت میں سامنے آیا جب پاکستان کی ٹیم نے حالیہ ٹی ٹوئنٹی ورلڈ کپ میں ناقص کارکردگی دکھائی تھی جس کے بعد پی سی بی میں متعدد تبدیلیاں دیکھنے میں آئیں۔
