بھارت نے پاکستان فٹبال ٹیم کو ساف کپ میں شرکت کی اجازت دے دی
رواں ماہ ہونے والے ساؤتھ ایشین فٹ بال فیڈریشن (ساف) کپ میں پاکستان فٹ بال ٹیم کی شرکت میں بڑی رکاوٹ دور ہوگئی ہے۔ آل انڈیا فٹ بال فیڈریشن کو ہندوستانی حکومت سے پاکستان فٹبال ٹیم کی میزبانی کی منظوری مل گئی ہے۔
ہندوستان اور پاکستان دونوں فٹ بال کے قابل اعتماد ذرائع نے تصدیق کی ہے کہ ہندوستان کے کھیل، داخلہ اور خارجہ وزراء نے ٹورنامنٹ میں پاکستان کی شرکت کے لیے تمام مطلوبہ منظوری دے دی ہے۔
ریجنل فٹ بال ٹورنامنٹ 21 جون سے 4 جولائی تک بنگلور میں کھیلا جائے گا اور ایونٹ کے لیے پاکستان 18 جون سے 5 جولائی تک بھارت میں ہوگا۔
ذرائع نے نجی نیوز کو بتایا کہ اے آئی ایف ایف نے پی ایف ایف کو ایک ای میل بھیجا ہے جس میں انہیں سرکاری دعوت نامہ کے ساتھ تمام ضروری دستاویزات فراہم کی گئی ہیں۔
پاکستان فٹبال ٹیم کے ارکان کو ویزے جاری کرنے کے لیے دستاویزات اسلام آباد اور ماریشس میں ہندوستانی سفارت خانوں کو بھی بھیجی گئی ہیں۔
پاکستان ماریشس سے ہندوستانی ویزوں کے لیے درخواست دینے کا منصوبہ بنا رہا ہے کیونکہ ٹیم چار ملکی ٹورنامنٹ میں شرکت کے لیے وہاں پرواز کر رہی ہے۔
یہ بھی پڑھیں | آئی سی سی نے بابر اعظم کو ماہ کا بہترین کھلاڑی نامزد کردیا
ذرائع نے اس بات کی بھی تصدیق کی ہے کہ پاکستان کے دفتر خارجہ نے ٹیم کو ماریشس جانے کے لیے کلیئرنس جاری کر دی ہے تاہم ٹیم کے دورہ بھارت کے بارے میں دفتر خارجہ نے ابھی کوئی فیصلہ نہیں کیا ہے۔
پاکستان اور بھارت کے درمیان کشیدہ تعلقات کی وجہ سے فٹ بال ہی نہیں بلکہ پاکستان کرکٹ بورڈ (پی سی بی) کی جانب سے اس سال کرکٹ کے ایشیا کپ کی میزبانی کے حوالے سے بھی غیر یقینی صورتحال ہے۔
واضح رہے کہ بورڈ آف کنٹرول فار کرکٹ ان انڈیا (بی سی سی آئی) نے ایشیا کپ کے لیے اپنی ٹیم پاکستان بھیجنے سے انکار کر دیا ہے اور اس بات کو یقینی بنانے کے لیے کوشاں ہے کہ ایونٹ کسی غیر جانبدار مقام پر منعقد کیا جائے۔
تاہم، پی سی بی ایونٹ کی میزبانی پاکستان سے باہر کرنے کا خواہاں نہیں ہے کیونکہ اس سے ملک میں بین الاقوامی کرکٹ کی واپسی کے حوالے سے اس کی کوششوں پر اثر پڑے گا۔
