پاکستان کرکٹ بورڈ (پی سی بی) نے برطانوی میڈیا کی جانب سے کیے گئے دعوؤں کو سختی سے مسترد کر دیا ہے جس میں کہا گیا تھا کہ 2025 کے آئی سی سی چیمپئنز ٹرافی کے فائنل کا مقام تبدیل کیا جا رہا ہے۔ برطانوی اخبار نے رپورٹ کیا تھا کہ اگر بھارت فائنل میں پہنچتا ہے تو یہ میچ پاکستان کے بجائے کسی اور ملک میں کھیلا جائے گا۔
پی سی بی کی جانب سے جاری کردہ بیان میں واضح طور پر کہا گیا کہ چیمپئنز ٹرافی کے تمام میچز بشمول فائنل پاکستان میں ہی ہوں گے اور اس حوالے سے کوئی بات چیت یا تجاویز زیر غور نہیں ہیں۔ پی سی بی نے اس بات پر زور دیا کہ ان کا موقف واضح ہے کہ ٹورنامنٹ کے تمام میچز پاکستان میں ہی منعقد ہوں گے۔
پی سی بی نے مزید کہا کہ اس وقت وہ چیمپئنز ٹرافی کے لیے بھرپور تیاریوں میں مصروف ہیں اور بھارتی کرکٹ بورڈ (بی سی سی آئی) نے ابھی تک بھارت کی شرکت کے حوالے سے کوئی فیصلہ نہیں کیا۔
