وفاقی آئینی عدالت نے جائیداد کی وراثت کے حوالے سے ایک تاریخی اور اہم فیصلہ جاری کرتے ہوئے قرار دیا ہے کہ محض ریونیو ریکارڈ یا سرکاری کاغذات کی بنیاد پر کسی بھی شخص کو اسلامی قانون کے تحت ملنے والے اس کے جائز وراثتی حق سے محروم نہیں کیا جا سکتا۔ وراثتی حقوق پر وفاقی آئینی عدالت کا فیصلہ چیف جسٹس امین الدین خان کی جانب سے تحریر کردہ 11 صفحات پر مشتمل ہے جس میں جسٹس امین الدین خان اور جسٹس علی باقر نجفی پر مشتمل دو رکنی بینچ نے لاہور ہائیکورٹ کا فیصلہ برقرار رکھتے ہوئے کنیز حیدر کی جانب سے دائر اپیلیں مسترد کر دیں۔
اسلامی قانونِ وراثت، عصبہ (Asabah) اور کزنز کا حصہ
عدالت نے اپنے تحریری فیصلے میں واضح کیا کہ وراثتی حقوق کا تعین محض خاندانی وابستگی یا قریبی رشتوں کی بنیاد پر نہیں کیا جا سکتا بلکہ جائیداد کی تقسیم لازمی طور پر اسلامی قانونِ وراثت اور اس کی مقررہ شرعی کیٹیگریز کے مطابق ہونی چاہیے۔ عدالت نے اس بات کی بھی وضاحت کی کہ مخصوص شرائط کے تحت چچا زاد بھائی بھی بچی ہوئی جائیداد میں حصہ دار ہو سکتے ہیں۔
وراثتی حقوق پر وفاقی آئینی عدالت کا فیصلہ میں درج ذیل اہم شرعی و قانونی نکات بیان کیے گئے ہیں:
عصبہ کا حق: بیوہ اور بہنوں میں مقررہ شرعی حصے تقسیم ہونے کے بعد جو جائیداد باقی بچ جاتی ہے وہ قانونی طور پر اہل عصبہ (Asabah) کا حق ہوتی ہے۔
اصولِ رد کا اطلاق: عدالت نے قرار دیا کہ جب کوئی قانونی طور پر اہل عصبہ وارث موجود ہو، تو بچی ہوئی جائیداد کو دوبارہ دیگر ورثاء میں تقسیم کرنے کا اصول (رد) لاگو نہیں ہو سکتا۔
محمد اصغر کی جائیداد کی تقسیم: متوفی محمد اصغر کے ترکے کے مقدمے میں عدالت نے ان کے چچا زاد بھائی کا وراثتی دعویٰ برقرار رکھتے ہوئے قرار دیا کہ بیوہ کو جائیداد کا ایک چوتھائی (1/4) اور دونوں سگی بہنوں کو مجموعی طور پر دو تہائی (2/3) حصہ ملے گا، جبکہ باقی بچنے والا ایک بارہواں (1/12) حصہ اہل عصبہ یعنی چچا زاد بھائی کو جائے گا۔
ریونیو ریکارڈ کی حیثیت اور فقہی قوانین کا اطلاق
عدالتِ عظمیٰ نے اس بات پر بھی زور دیا کہ محکمہ مال کی اندراجات یا محض طریقہ کار کی رسمی کارروائیاں کسی فرد کے شرعی وراثتی حق کو تبدیل نہیں کر سکتیں اور نہ ہی جائیداد کی کسی غیر قانونی تقسیم کو جائز قرار دے سکتی ہیں۔ مزید برآں بینچ نے واضح کیا کہ سنی اور شیعہ مکاتبِ فکر کے قوانینِ وراثت میں فرق موجود ہے اس لیے جائیداد کی تقسیم متوفی پر لاگو ہونے والے مسلم پرسنل لا کے عین مطابق کی جانی چاہیے۔






