(نادرہ – NADRA) نے پاکستان کے 79ویں یومِ آزادی کے موقع پر نادرہ کا کیو آر کوڈ شناختی کارڈ متعارف کرایا، جو کیو آر کوڈ پر مبنی جدید پاکستانی شناختی کارڈ ہے۔ وفاقی حکومت کی منظوری کے بعد متعارف کرائے گئے اس کارڈ میں درآمد شدہ مائیکرو چپ کی جگہ جدید اور محفوظ کیو آر کوڈ شامل کیا گیا ہے۔
اس کارڈ کو مکمل طور پر ملکی سطح پر نیشنل سیکیورٹی پرنٹنگ کمپنی کراچی کے تعاون سے تیار کیا گیا ہ جس سے نہ صرف غیر ملکی چپ پر انحصار ختم ہو گیا ہے بلکہ ڈیجیٹل تصدیق کا نظام بھی انتہائی تیز اور محفوظ ہو گیا ہے۔
کیو آر کوڈ شناختی کارڈ کی خصوصیات اور چپ کا خاتمہ
تقریباً 14 سال قبل چپ پر مبنی اسمارٹ شناختی کارڈ متعارف کرائے گئے تھے، لیکن زمینی حقائق یہ تھے کہ ملک بھر کے بینکوں، اسپتالوں اور دیگر اداروں میں چپ ریڈرز اور مطلوبہ انفراسٹرکچر نہ ہونے کی وجہ سے چپ کے فیچرز کارآمد ثابت نہیں ہو رہے تھے۔
نادرہ کے اس نئے کیو آر کوڈ شناختی کارڈ میں ان تمام مشکلات کا حل نکال لیا گیا ہے۔ اس کی اہم خصوصیات درج ذیل ہیں:
اسمارٹ فون سے تصدیق: اب اس کارڈ پر موجود کیو آر کوڈ کو عام اسمارٹ فون کے ذریعے نادرہ کی پاک آئیڈینٹی (PakID) موبائل ایپلیکیشن یا نادرہ کے سافٹ ویئر سے فوری اسکین اور وریفائی کیا جا سکے گا۔
در درست ڈیٹا: کیو آر کوڈ میں کارڈ ہولڈر کا تمام ضروری ڈیٹا اور تصویر موجود ہوگی، جس سے اداروں کے اندر ڈیٹا انٹری کی غلطیاں ختم ہوں گی اور نام و پتہ مستقل مزاجی سے درج ہوگا۔
دو لسانی ڈسپلے: کارڈ پر شہری کا نام اور پتہ اردو اور انگریزی دونوں زبانوں میں واضح درج ہوگا۔
خصوصی علامات: اس کارڈ پر معذور افراد ، بزرگ شہریوں، اعضا کے عطیہ دہندگان اور آزاد جموں و کشمیر کے شہریوں کے لیے مخصوص علامات بھی نمایاں ہوں گی۔
مختلف اداروں کے لیے آسان ڈیجیٹل تصدیق کا نظام
چپ ریڈر نہ ہونے کا مسئلہ اب قصہ پارینہ بن چکا ہے۔ نادرہ کی جانب سے ٹیلی کام آپریٹرز، کمرشل بینکوں، اسپتالوں، پاکستان ریلوے، پولیس اور دیگر مجاز اداروں کو کیو آر کوڈ اسکین کرنے کے لیے خصوصی سافٹ ویئر اور کیمرہ بیسڈ ریڈنگ ٹولز فراہم کیے جا رہے ہیں۔
اسٹیٹ آف دی آرٹ سیکیورٹی فیچرز سے لیس یہ کارڈ ملکی مینوفیکچرنگ کی صلاحیتوں کو مدنظر رکھتے ہوئے تیار کیا گیا ہے جو سکیورٹی کے جدید ترین بین الاقوامی معیار پر پورا اترتا ہے۔
تین مراحل میں نفاذ کا شیڈول اور پرانے کارڈز کی حیثیت
نادرہ اس نئے کارڈ کو مرحلہ وار پورے ملک میں نافذ کر رہا ہے:
پہلا مرحلہ (14 اگست 2026): اس تاریخ سے نئے کیو آر کوڈ کارڈ کا اجراء صرف عام قومی شناختی کارڈ (CNIC) کے لیے شروع کر دیا گیا ہے۔
دوسرا مرحلہ (جنوری 2027): اس ماہ سے اوورسیز پاکستانیوں کے لیے شناختی کارڈ (NICOP) اور نابالغ بچوں کے کارڈز بھی اسی چپلیس کیو آر فارمیٹ میں جاری ہوں گے۔
آخری مرحلہ: فائنل فیز میں پاکستان اوریجن کارڈ بھی مکمل طور پر اسی نئے کیو آر کوڈ سسٹم پر منتقل ہو جائے گا۔
