پاکستان پیپلز پارٹی کے سینئر رہنما اور سابق گورنر سندھ کمال الدین اظفر پیر کے روز کراچی میں انتقال کر گئے ہیں۔ اہل خانہ اور پارٹی ذرائع کے مطابق وہ ضیاء الدین اسپتال میں زیر علاج تھے جہاں انہوں نے زندگی کی آخری سانسیں لیں۔
پی پی پی سندھ کے جنرل سیکریٹری سینیٹر وقار مہدی نے ان کے انتقال کی تصدیق کرتے ہوئے بتایا کہ ان کی نمازِ جنازہ بچوں کے بیرون ملک سے واپس آنے کے بعد ادا کی جائے گی۔
کمال الدین اظفر سابق وزیرِ اعظم ذوالفقار علی بھٹو کے قریبی ساتھی تھے اور ایک وقت میں پی پی پی کراچی کے صدر بھی رہے۔ انہوں نے کراچی میں غریب طبقے کے لیے لائنز ایریا میں سستے گھروں کی تعمیر سمیت کئی عوامی خدمات انجام دیں جس کے باعث وہ فرزند کراچی کہلائے۔
انہیں 1995 میں بینظیر بھٹو نے سندھ کا گورنر مقرر کیا تھا۔ اس سے پہلے وہ سینیٹر اور سندھ کے وزیر خزانہ بھی رہے ہیں۔
وزیراعلیٰ سندھ مراد علی شاہ نے ان کے انتقال پر افسوس کا اظہار کرتے ہوئے انہیں ایک دانشمند سیاستدان قرار دیا ہے اور کہا ہے کہ ان کی سیاسی خدمات ہمیشہ یاد رکھی جائیں گی۔ پی پی پی کی سینیٹر شیریں رحمان نے بھی افسوس کا اظہار کرتے ہوئے کہا ہے کہ کمال الدین اظفر ایک پرعزم سیاسی کارکن تھے جو بینظیر بھٹو کے ساتھ مقامی حکومت سے متعلق پالیسیوں پر قریبی کام کرتے رہے ہیں ۔
Grieved to see Barrister Kamaluddin Azfar pass away. He served in many positions including Governor Sindh, and was a well known activist as well as politician from Karachi, who worked closely with Shaheed Benazir Bhutto on local government policies among other initiatives.… pic.twitter.com/5EE3Oh06o8
— SenatorSherryRehman (@sherryrehman) May 26, 2025
کمال الدین اظفر کا تعلیمی اور قانونی پس منظر بھی انتہائی مضبوط تھا۔ انہوں نے گورنمنٹ کالج لاہور اور آکسفورڈ یونیورسٹی کے بلیئول کالج میں تعلیم حاصل کی اور انر ٹیمپل، لندن سے بار ایٹ لا کی ڈگری حاصل کی۔ بعد ازاں وہ کراچی واپس آکر وکالت کے پیشے سے منسلک ہو گئے۔
وہ ایک ممتاز مصنف اور ماہر معیشت بھی تھے۔ انہوں نے نوبیل انعام یافتہ ماہر معاشیات گنار میرڈل کے ساتھ تحقیقاتی اسسٹنٹ کے طور پر کام کیا۔ ان کی نمایاں تصانیف میں شامل ہیں:
The Chinese Synthesis (1975)
Pakistan: Political and Constitutional Dilemmas (1987)
Pakistan under the Military (1991)
Asian Drama Revisited (1992)
Good Governance (1994)
Discovery of Pakistan (2005)
Waters of Lahore (2014)
انہوں نے متعدد اہم سرکاری عہدوں پر خدمات انجام دیں جن میں شامل ہیں:
سندھ کے وزیر خزانہ، منصوبہ بندی و ترقی
وفاقی وزیر برائے بلدیات و دیہی ترقی
وزیرِ اعظم کے خصوصی معاون
کمال الدین اظفر کی وفات سے پاکستان بالخصوص کراچی ایک تجربہ کار، علم دوست اور عوامی خدمت گزار سیاستدان سے محروم ہو گیا ہے۔یہ بھی پڑھیں : آرمی چیف جنرل عاصم منیر کی پاکستان کرپٹو کونسل کے سربراہ سے ملاقات
