کراچی: کرکٹر بابراعظم نے ایک اور تاریخی سنگ میل عبور کرتے ہوئے ایک روزہ بین الاقوامی کرکٹ (ODI) میں تیز ترین 6 ہزار رنز مکمل کر لیے ہیں۔
بابر اعظم کا تیز ترین 6 ہزار رنز بنانے کا ریکارڈ
بابراعظم نے یہ کارنامہ 123 اننگز میں مکمل کیا جس کے ساتھ ہی وہ جنوبی افریقی بلے باز ہاشم آملہ کے ہم پلہ ہو گئے جنہوں نے بھی اتنی ہی اننگز میں 6,000 رنز بنائے تھے۔ اس کے ساتھ ساتھ، بابراعظم سب سے کم اننگز میں یہ کارنامہ سر انجام دینے والے پہلے ایشیائی بلے باز بھی بن گئے ہیں۔ اس سے قبل یہ اعزاز بھارتی کھلاڑی ویرات کوہلی کے پاس تھا، جنہوں نے 136 اننگز میں 6,000 رنز مکمل کیے تھے۔
پاکستان کے 11ویں بیٹر کا اعزاز
بابراعظم یہ سنگ میل عبور کرنے والے پاکستان کے 11ویں بیٹر بن گئے ہیں۔ اس سے قبل انضمام الحق، محمد یوسف، سعید انور، شاہد آفریدی، شعیب ملک، جاوید میانداد، یونس خان، سلیم ملک، محمد حفیظ اور اعجاز احمد بھی یہ کارنامہ انجام دے چکے ہیں۔
یہ شاندار کارکردگی انہوں نے آج کراچی کے نیشنل اسٹیڈیم میں نیوزی لینڈ کے خلاف ٹرائی نیشن سیریز کے فائنل میں اپنی اننگز کے دسویں رن کے ساتھ حاصل کی۔
