پاکستان کے سابق وزیر اعظم نواز شریف نے بھارتی وزیر اعظم نریندر مودی کو مبارکبادی پیغام میں نفرت کو امید میں بدلنے کی تاکید کی ہے۔ شہباز شریف نے بھی مودی کو تیسری مدت کے لیے وزیر اعظم کا منصب سنبھالنے پر مبارکباد دی ہے۔ بھارتیہ جنتا پارٹی (بی جے پی) کے رہنما نریندر مودی نے اتوار کے روز وزیر اعظم کے عہدے کا حلف لیا اور پیر کو باقاعدہ اپنی ذمہ داریاں سنبھالنے کے بعد 72 رکنی کابینہ کے اراکین میں وزارتیں تقسیم کیں۔ وزیر داخلہ، وزیر خارجہ، وزیر دفاع اور وزیر خزانہ جیسے اہم عہدوں پر سابق وزراء امیت شاہ، ایس جے شنکر، راج ناتھ سنگھ اور نرملا سیتا رمن کو برقرار رکھا گیا ہے۔ اس دوران پاکستان کے وزیر اعظم شہباز شریف نے سوشل میڈیا کے ذریعے نریندر مودی کو مبارکباد دی۔
شہباز شریف نے لکھا، "میں نریندر مودی کو وزیر اعظم کا حلف اٹھانے پر مبارکباد دیتا ہوں۔”
بھارتی وزیر اعظم نے ایک ٹویٹ کرکے اپنے پاکستانی ہم منصب شہباز شریف کا شکریہ ادا کیا۔ انہوں نے لکھا، "آپ کی نیک خواہشات کے لیے آپ کا شکریہ۔”
قابل ذکر ہے کہ پاکستانی وزیر اعظم ان سربراہان میں شامل نہیں تھے جو وزیر اعظم نریندر مودی کی حلف برداری کی تقریب میں شریک تھے۔ اتوار کے روز حلف برداری کی تقریب میں بنگلہ دیش، نیپال، سری لنکا، مالدیپ، بھوٹان اور سیشلز کے رہنما موجود تھے۔ بھارتی وزارت خارجہ نے ایک بیان میں کہا کہ "پڑوسی پہلے” کی پالیسی کے تحت نئی دہلی نے ساتوں پڑوسی ملکوں کے سربراہان کو دعوت دی تھی۔
نریندر مودی نے نواز شریف کے پیغام کا جواب دیتے ہوئے کہا، "آپ (نواز شریف) کے پیغام کی قدر کرتے ہیں۔” انہوں نے ایکس پر نواز شریف کو جواب دیتے ہوئے مزید لکھا، "بھارت کے عوام ہمیشہ امن، سلامتی اور ترقی پسند خیالات کے حامی رہے ہیں۔ اپنے عوام کی فلاح و بہبود اور سلامتی کو آگے بڑھانا ہمیشہ ہماری ترجیح رہے گی۔”
یاد رہے کہ نواز شریف نے 2014ء میں نریندر مودی کی پہلی حلف برداری کی تقریب میں شرکت کی تھی جبکہ نریندر مودی نے بھی عہدہ سنبھالنے کے ایک سال بعد پاکستان کا مختصر دورہ کیا تھا جہاں انہوں نے لاہور میں نواز شریف کی نواسی اور موجودہ وزیر اعلیٰ پنجاب مریم نواز کی صاحبزادی کی شادی میں شرکت کی تھی۔
