وفاقی وزیرِ قانون اعظم نذیر تارڑ نے منگل کے روز 27ویں آئینی ترمیم کا بل قومی اسمبلی میں پیش کر دیا۔ یہ اقدام ایک دن بعد سامنے آیا جب حکومت نے یہ بل سینیٹ سے کامیابی کے ساتھ منظور کروا لیا۔
یہ بل قومی اسمبلی سے منظور ہونے کے لیے دو تہائی اکثریت کا محتاج ہے۔ حکومتی اتحاد کو 336 رکنی ایوان میں واضح برتری حاصل ہے، جبکہ اپوزیشن کے پاس 103 نشستیں ہیں۔ اتحادی جماعتوں میں مسلم لیگ (ن) کے 125، پیپلز پارٹی کے 74، ایم کیو ایم کے 22، مسلم لیگ (ق) کے 5، استحکامِ پاکستان پارٹی کے 4 اور پی ایم ایل (ض)، بلوچستان عوامی پارٹی اور نیشنل پیپلز پارٹی کی ایک ایک نشست شامل ہے۔
اجلاس کا آغاز مرحوم سینیٹر عرفان صدیقی کے لیے دعا سے ہوا جس کے بعد اسپیکر ایاز صادق نے وزیرِ قانون سے ایجنڈے کے مطابق بل پیش کرنے کو کہا۔
آئینی عدالت کے قیام کی تجویز
اعظم نذیر تارڑ نے بل پیش کرتے ہوئے بتایا کہ جب 26ویں آئینی ترمیم پیش کی گئی تھی تو دو بڑی جماعتوں نے چارٹر آف ڈیموکریسی کے تحت کچھ ترامیم پر اتفاق کیا تھا۔ اُس وقت طے پایا تھا کہ ’’آئینی عدالت‘‘ کے بجائے ’’آئینی بینچ‘‘ قائم کیا جائے لیکن بعد میں اس پر تنقید ہوئی کہ ایک عدالت کے اندر دوسری عدالت بنائی جا رہی ہے۔
انہوں نے کہا کہ حالیہ مشاورت کے بعد فیصلہ کیا گیا ہے کہ ایک نیا ادارہ وفاقی آئینی عدالت (Federal Constitutional Court – FCC) قائم کیا جائے جو حساس آئینی معاملات کو نمٹائے۔
وزیرِ قانون نے واضح کیا کہ اس ترمیم کے تحت آئین کا آرٹیکل 184(3) ختم نہیں کیا جا رہا بلکہ اس کی اختیارات کو ایف سی سی میں منتقل کیا جا رہا ہے، اور آئین میں آرٹیکل 175-بی کے بعد ایک نئی شق شامل کی جا رہی ہے جو اس عدالت کے دائرہ اختیار کو بیان کرے گی۔
ازخود نوٹس (Suo Motu) اختیارات میں تبدیلی
تارڑ نے بتایا کہ ایف سی سی کو ازخود نوٹس لینے کے اختیارات نہیں دیے جا رہے۔ اس کے لیے درخواست دینا لازمی ہوگا، اور معاملہ عوامی اہمیت اور بنیادی حقوق سے متعلق ہونا چاہیے۔ انہوں نے زور دیا کہ ’’یہ اختیار کسی فرد کو نشانہ بنانے کے لیے استعمال نہیں کیا جائے گا۔‘‘
ججوں کے تبادلے اور اختیارات
بل میں تجویز دی گئی ہے کہ ججوں کے تبادلے کے اختیار کو جوڈیشل کمیشن آف پاکستان (JCP) کو دیا جائے۔ اگر کوئی جج تبادلہ قبول نہ کرے تو اسے اپنا موقف پیش کرنے کا موقع دیا جائے گا۔ اگر جے سی پی فیصلہ برقرار رکھے اور جج تبادلہ مسترد کرے تو معاملہ سپریم جوڈیشل کونسل (SJC) کے سامنے بھیجا جائے گا جو حتمی فیصلہ دے گی۔
دو اعلیٰ عدالتوں کا نظام
27ویں ترمیم کے تحت اب ملک میں دو اعلیٰ ترین عدالتیں ہوں گی:
- سپریم کورٹ آف پاکستان
- وفاقی آئینی عدالت (FCC)
ایف سی سی کو وہی اختیارات حاصل ہوں گے جو پہلے 26ویں ترمیم کے تحت بنائے گئے آئینی بینچ کو دیے گئے تھے، جن میں آرٹیکل 184 اور 186 کے تحت مقدمات، صوبوں کے درمیان تنازعات، صدارتی ریفرنسز، کیسوں کی منتقلی اور کچھ مخصوص حالات میں آئینی درخواستوں پر فیصلے شامل ہیں۔
تارڑ کے مطابق، اس سے سپریم کورٹ پر کیسز کا دباؤ کم ہوگا اور عام شہریوں کے مقدمات جلدی سنے جا سکیں گے۔
چیف جسٹس اور سینیارٹی کا نظام
موجودہ چیف جسٹس یحییٰ آفریدی نئے نظام کے تحت بھی جے سی پی اور ایس جے سی کے سربراہ رہیں گے۔ سپریم کورٹ اور ایف سی سی کے سینیئر ترین جج ان اداروں کی سربراہی کریں گے۔ اگر دو جج ایک ہی دن تعینات ہوں تو سینیارٹی ان کے اعلیٰ عدالت میں شمولیت کی تاریخ سے طے ہوگی۔
جے سی پی کے پانچ رکنی پینل میں سپریم کورٹ اور ایف سی سی کے سینئر ججز شامل ہوں گے۔ دونوں چیف جسٹس متفقہ طور پر پانچویں رکن کا انتخاب کریں گے بصورت دیگر فیصلہ کمیشن کو بھیجا جائے گا۔
سینیٹ میں منظوری اور ترامیم
گزشتہ روز سینیٹ نے یہ بل دو تہائی اکثریت سے منظور کیا۔ ووٹنگ کے دوران اپوزیشن نے شور شرابا کیا اور بل کی کاپیاں پھاڑ دیں۔ تاہم پی ٹی آئی اور جے یو آئی (ف) کے دو اراکین نے پارٹی پالیسی کے خلاف حکومت کا ساتھ دیا۔
بعد ازاں، پیپلز پارٹی کے سینیٹر فاروق نائیک نے بل کی تفصیلات پیش کیں، جن کے مطابق چند اہم تبدیلیاں کی گئی ہیں:
ایف سی سی میں تمام صوبوں اور اسلام آباد ہائی کورٹ کی برابر نمائندگی ہوگی۔
جج کے لیے ہائی کورٹ میں کم از کم تجربہ سات سال سے کم کر کے پانچ سال کر دیا گیا ہے۔
جے سی پی میں نامزدگی اب صرف خواتین یا غیر مسلم تک محدود نہیں بلکہ ٹیکنوکریٹ بھی نامزد کیا جا سکے گا۔
ایف سی سی ازخود نوٹس صرف درخواست ملنے پر لے سکے گی۔
محصولات (ریونیو) کے مقدمات میں عبوری حکم ایک سال بعد خود بخود ختم ہو جائے گا اگر فیصلہ نہ دیا گیا۔
آرٹیکل 248 کے تحت صدرِ مملکت، فیلڈ مارشل، ایئر فورس مارشل اور نیوی ایڈمرل کو مدتِ ملازمت کے بعد عمر بھر استثنیٰ حاصل ہوگا بشرطیکہ وہ کسی سرکاری عہدے پر فائز نہ ہوں۔
